АНУ-ын томоохон "Twitter" хаягууд цахим халдлагад өртжээ

АНУ-ын олны танил, нэр нөлөө бүхий хүмүүс болон томоохон брэндүүдийн "Twitter" хаяг биткойн залилантай холбоотой цахим халдлагад өртжээ. 

Жо Байден, Билл Гейтс, Элон Маск болон "Apple" компанийн албан ёсны хуудас өнөөдөр халдлагад өртөн, эдгээр хуудас дээр биткойн луйврыг сурталчилсан утгатай мэдээллүүд тавигдсан юм. Түүнчлэн Ерөнхийлөгч асан Барак Обама, рэппер Канье Уэст, түүний эхнэр Ким Кардашиан Уэст, тэрбумтан Жефф Безос нарын хаяг дээр биткойноор дамжуулан хандив цуглуулах хүсэлт гаргасан ижил төстэй жиргээнүүдийг байршуулсан байлаа.

Билл Гэйтсийн хаяг дээр тавигдсан жиргээн дээр "Хүн болгон надаас олон нийтэд тусламж үзүүлэхийг гуйдаг. Одоо цаг нь боллоо. Би 30 минутын турш биткойн хаяг руу маань илгээсэн бүх гүйлгээг хоёр дахин нэмэгдүүлэн өгөхөө амлаж байна. Та 1,000 доллар илгээвэл би танд 2,000 доллар болгож, буцааж өгнө" гэсэн байв. Эдгээр жиргээнүүд нийтлэгдээд, хэдхэн минутын дараа устгагдсан ажээ. 

"Twitter" компани шуурхай арга хэмжээ авч, энэхүү халдлага эхэлснээс хойш цаг гаруйн дараа цэнхэр тэмдэглэл бүхий баталгаажсан хаягуудын жиргэх болон нууц үгээ солих эрхийг нь хаажээ. Харин баталгаажаагүй хаягууд ердийн адил жиргэж боломжтой байсан байна. Цахим халдлага эхэлснээс гурван цагийн дараа уг платформын төлөөлөгчид ихэнх хаягууд эргээд хэвийн үйл ажиллагаанд шилжсэнийг мэдэгдсэн юм.

Зарим жиргээн дээр байрлуулсан биткойн данс дөнгөж өнөөдөр нээгдсэн байсан бөгөөд халдлага эхэлснээс хойш хэдхэн цагийн дараа уг данс олон зуун шилжүүлгээр дамжуулан 100,000 доллар хүлээн авсан болохыг биткойн судлаач Тим Коттен тэмдэглэжээ.

Олон тооны нэр нөлөө бүхий хүмүүсийн хуудсыг хамарсан энэхүү халдлага "Twitter"-ийн түүхэн дэх хамгийн ноцтой цахим аюулгүй байдлын зөрчил боллоо.

Эх сурвалж: CNN