Тэмцээнд оролцох эрхээ "азаар" авсан ч түрүүлж чадлаа

Снукер биллиардын хамгийн цөөн бөгөөд чансаа өндөртэй тамирчид оролцдог "Coral Tour Championship 2020" энэ сарын 20-26-ны өдрүүдэд Англи улсын Милтон Кийнес хотноо зохион байгуулагдлаа. 

Өнгөрсөн жилээс эхлэлтэй тус тэмцээнд сүүлийн нэг жилийн хугацаанд дэлхийн чансааны эхний 8-д эрэмбэлэгддэг тамирчид урилгаар оролцдог дүрэмтэй. Өнгөрсөн жил буюу анхны "Coral Tour Championship" тэмцээнд домогт Ронни О Сулливан түрүүлж байсан бол энэ удаад Шотланд гаралтай Стефен Магуир түрүүллээ. Энд нэг сонирхолтой мэдээлэл өгөхөд Стефен Магуир чансаагаараа "Coral Tour Championship 2020" тэмцээнд оролцох эрхээ авч чадаагүй ч БНХАУ-ын тамирчин Дин Жунхуй оролцохоос татгалзсан тул оролцох эрхтэй болсон төдийгүй түрүүлж чадлаа. Стефен Магуирын хувьд 2004 онд анх чансааны тэмцээнд түрүүлснээсээ хойш чансааны зургаа дахь түрүүгээ хүртэж буй нь энэ юм. 

Шигшээ тоглолтод Стефен Магуир Ирланд тамирчин Марк Аллентай тунан үлдлээ. Тэд 11 дэх удаагаа учирсан нь энэ бөгөөд өмнө нь Марк Аллен долоон удаа Стефен Магуирыг хожоод байлаа. Тоглолт эхнээсээ эн тэнцүүхэн явж байсан ч эцсийн дүнд Стефен Магуир 10:6 харьцаагаар ялалт байгууллаа. Шигшээ тоглолтыг бүрэн эхээр нь толилуулж байна.