“Өүлэн” Л.Өнөрчимэгт "хамууд" нь 343, Чингис хаанд сонгогчид 671 санал өгчээ

УИХ-ын 2020 оны ээлжит сонгууль өчигдөр/2020.06.24/ өндөрлөлөө. Энэ удаагийн сонгуульд хэд хэдэн содон нэр дэвшигч өрсөлдөж, саналыг нь хуваагаад амжлаа. Харин тэр содонгууд хэн, хэн бөгөөд хэдэн сонгогчдын санал авсныг танилцуулъя.

Баянзүрх дүүргийн 22 дугаар тойрогт “Өүлэн” хэмээх Л.Өнөрчимэг “Хөгжлийн хөтөлбөр” намаас нэр дэвшсэн бөгөөд түүний “хамууд" нь 343 саналыг өгчээ.

УИХ-ын сонгуулийн 28 дугаар тойрог буюу Сонгинохайрхан дүүрэгт “Эрх чөлөөг хэрэгжүүлэгч нам”-аас Н.Ган-Од буюу Ганбууш нэр дэвшиж, 599 сонгогчдын санал авсан.

Харин Сүхбаатар дүүрэг буюу 24-р тойрогт олон нийтийн сүлжээнд өөрийгөө Чингис хааны хойд дүр хэмээн зарлаж олонд танигдсан М.Чингисхаан нэр дэвшиж, 671 иргэний саналыг авч чадсан байна.

“Хохирогчдын холбоо”-ны тэргүүн Х.Оюунцэцэг Сонгинохайрхан дүүргийн 27-р тойрогт “Шинэ” эвслээс нэр дэвшин 1274 сонгогчдын итгэлийг хүлээжээ.

Харин олон улсын тоймч Ш.Гантулгын хувьд Сонгинохайран дүүргийн 28-р тойрогт бие даан нэр дэвшсэн бөгөөд түүнтэй ижил, овог нэртэй хүн тус тойрогт нэр дэвшсэн асуудал гарсан билээ. Түүний хувьд 3333 иргэний итгэлийг хүлээсэн байна.

УИХ-ын сонгуулийн 26 дугаар тойрог буюу Баянгол дүүрэгт бие даан нэр дэвшсэн дуучин М.Нарантуяа /Нара/ 8596 сонгогчдын санал авчээ.

“Үнэн ба зөв” намын дарга А.Отгонбаатар Өвөрхангай аймгийн 9981 сонгогчдын саналыг авав.

Самандын Жавхлангийн хувьд Ардчилсан намаас Увс аймагт нэр дэвшиж, 12403 сонгогчид түүнд итгэл үзүүлсэн байна.

УИХ-ын сонгууль эхлэхээс өмнө АН-ын дарга С.Эрдэнийн булхайг илчилж байсан П.Галиндэв түүнийг "Баянгол дүүрэгт унагаах болно" хэмээн мэдэгдэж бие даан нэр дэвшсэн. Тэр амлалтандаа хүрэх шахаж, 25866 саналаар АН-ын дарга С.Эрдэнийн /17031/ өмнө гарч чадсан юм.

Энэ жилийн хувьд коронавирусийн хөл хорионы улмаас эх орондоо ирж чадаагүй ч хилийн чанадаас хэд хэдэн нэр дэвшигч сонгуульд оролцсоны нэг нь "Ард Түмнээ Хайрлая" намын дарга Л.Гүндалай Тайландаас нэр дэвшсэн явдал юм. Л.Гүндалай сонгуулийн сурталчилгаагаа Тайландаас тайван замаар "live"-дан, хөл хорионд нэг сайн уйлж аваад л Хөвсгөлд гайгүй рейтингтэй буюу 17726 сонгогчдын санал авч дөрөвт “давхилаа”. Гэтэл 20 хоног махийтал зүтгэсэн нэр дэвшигчид түүний амжилтыг эвдэж чадаагүй юм.

Энэ удаагийн сонгуульд улсын хэмжээнд хамгийн олон хүний санал авсан хүнээр Ерөнхий сайд У.Хүрэлсүх тодорсон бөгөөд тэрээр Хэнтийн нийт сонгогчдын 72.2 хувийн итгэлийг хүлээжээ. Тэгвэл хамгийн бага санал авсан хүнээр Дундговь аймагт  “Сахигтун! Үндсэн хуулийн 19” эвслээс нэр дэвшигч Ц.Эрдэнэбат 38 сонгогчдын санал авсан байх юм.