БНАСАУ БНСУ-аас харилцаа холбооны бүх шугам, сүлжээгээ тасалжээ

БНАСАУ өнөөдөр буюу мягмар гарагаас эхлэн хамгийн ойрын хөрш БНСУ-тай холбогдох бүх төрлийн холбоо харилцааны сүлжээ, тэр бүү хэл төрийн удирдагчдын холбоо барьдаг тусгай шугамыг ч хаахаа мэдэгджээ. Умард Солонгосын талаас Өмнөд Солонгосыг “дайсан” хэмээн мэдэгдэж анх удаа ноцтой арга хэмжээ авч буйгаа илэрхийлжээ.

Өнөөдрөөс эхлэн Умард Солонгосын хил дээр байдаг Кэсонг хот дахь холбоо харилцааны газартай хийдэг өдөр тутмын дуудлага мэдээлэл түр зогсох юм байна. 2018 онд хоёр улсын зөрчлийг намжаах зорилгоор уг албан газрыг байгуулжээ.

Солонгосын дайн 1953 онд дууссан ч энх тайвны гэрээ хэлэлцээр байгуулаагүй учир дайсагнасан байдал үргэлжилсээр байгаа юм. Умард Солонгосын төв мэдээллийн агентлагаар Умард болон Өмнөдийн эрх баригчдын дуудлага хийдэг сүлжээг 2020 оны зургадугаар сарын 9-ны 12:00 цагаас эхлэн бүрмөсөн тасалж байна гэжээ.

Мөн цэргийн зориулалтаар ашигладаг холбоо харилцааны сүлжээг ч мөн салгана гэжээ. Энэ оны эхэнд коронавирус тархаж эхлэхэд хорио цээр тогтоон нэгдүгээр сард хоёр улсын дундын албан газрыг хаасан ч утсаар холбоо тогтоосоор байсан юм. Уг албаар дамжуулан хоёр Солонгосын эрх баригчид өдөр бүрийн 09:00, 17:00 цагуудад утсаар дуудлага хийдэг байжээ.

Дуудлага хийж эхэлснээс хойш жил есөн сарын дараа анх удаа даваа гарагийн өглөө залгахад Умардын тал хариулаагүй байна. Төв телевизийн үргэлжлүүлэн мэдэгдсэнээр Өмнөд Солонгосын эрх баригчидтай нүүр тулан уулзах шаардлагагүй, тэд зөвхөн дайсагнасан байдлыг үүсгэж байна хэмээжээ.

Умардын удирдагч Ким Жон Уны дүү Ким Ё Жон жил бүр Өмнөдийн талаас илгээдэг ухуулах хуудас бүхий бөмбөлгийг 2018 онд Панмунжоны дээд хэмжээний уулзалтын үеэр хоёр улсын удирдагчдын байгуулсан энхийн гэрээ хэлэлцээрийг ноцтой зөрчсөн үйлдэл хэмээн өнгөрсөн долоо хоногт хатуу шүүмжилжээ. Үүнээс өмнө Өмнөд Солонгосын тал ухуулах хуудас бүхий бөмбөлгийг хөөргөх үйл ажиллагааг энэ жил хорьсон юм.

Эх сурвалж: ВВС