БИЧЛЭГ: Үйлдвэрийн захирал асан орон сууцны цонхоор иргэд рүү гал нээжээ
ОХУ-ын нийслэл Москвад өнгөрөгч ням гараг буюу зургадугаар сарын 7-ны орой, 22:00 цагийн орчим Дмитрий Павлов гэх эрэгтэй Барилгын гудамж дахь орон сууцныхаа цонхноос иргэд рүү гал нээсэн хэрэг гарчээ. Барилгын ойролцоо такси хүлээж байсан эрэгтэй, эмэгтэй хоёр шархадсан байна.
Иргэд рүү ангийн буугаар гал нээсэн Павловыг баривчлах ажиллагаа цаг хагасын турш үргэлжилжээ. Тэрээр цагдаагийн хүчин рүү үргэлжлүүлэн буудсаар байсан бөгөөд албаны нэг хүнийг мөн шархдуулжээ. Түүнчлэн тэр өөрөө ч бас шархадсан учир яаралтай тусламжаар эмнэлэгт хүргэгджээ.
Харин өнөөдөр Дмитрий Павлов шархаа дийлэлгүй, нас барсан болохыг нийслэлийн Мөрдөн байцаах хорооноос мэдээллээ.
Урьдчилсан мэдээллээр 50 настай Дмитрий Павлов сэтгэцийн эмгэгтэй нэгэн байсан гэж мэдээллээ. Гэвч тэрээр өмнө нь “Серп и молот” үйлдвэрийн гүйцэтгэх захирлаар ажиллаж байсан, мөн Нийслэлийн шинжлэх ухаан, үйлдвэрлэлийн бодлогын газрын орлогч даргаар ажиллаж байжээ. Тэрээр саяхан эхнэрээсээ салаад байсан гэнэ.
Эх сурвалж: НТВ
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.