Жагсагчид боолын худалдаачны хөшөөг буулгаж, хаяжээ
АНУ-ын өнгөт арьстай иргэн Жорж Флойдын зүй бус үхлийн дараа олон улсад арьс өнгөөр ялгаварлан гадуурхах үзлийн эсрэг жагсаал зохион байгуулагдаж байна. Эдгээр улс орнуудын нэг Их Британид жагсагчид боолын худалдаачны хөшөөг нурааж, эрэгт шиджээ.
Английн Бристол хотод өчигдөр болсон тайван жагсаалын үеэр жагсагчид цагдаа нартай мөргөлдсөн хэрэг гарсан байна. Бристолоос гадна Манчестер, Волверхэмптон, Ноттингхэм, Гласгөү, Эдинбург хотуудад жагсаал болжээ.
Бристолын жагсагчид олс авчран 17 дугаар зууны үед боолын наймаачин байсан гэдгээрээ алдартай Эдвард Колстоны хүрэл хөшөөг татаж буулгасан байна. Түүний хөшөөг хотын төвд байлгах эсэх нь эртнээс маргаантай асуудал байжээ. Колстон нь Эзэн хааны Африкийн бүс хариуцсан төлөөлөгчдийн нэг байсан ба амьд ахуйдаа Африк тивээс 80,000 орчим эрэгтэй, эмэгтэй, хүүхэд багачуудыг Америк тив рүү тээвэрлэж, худалдаалсан ажээ.
Тэрээр 1721 онд нас барахдаа өөрийн хурааж хуримтлуулсан хөрөнгөө сайн үйлсэд хандивлахыг гэрээсэлсэн учир хөшөөг нь босгосон байна. Уг хөшөөг буулгасны дараа аль эрт энэ үйлдлийг хийх ёстой байсан хэмээн олон хүн байр сууриа илэрхийлжээ.
Эх сурвалж: ВВС
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.