Японы нэгэн их сургуулийн зохион бүтээгчдийн баг орон нутгийн нэхмэлийн үйлдвэрлэгчтэй хамтран вирусийн тоосонцрыг идэвхгүйжүүлэх явцыг хурдасгах чадвартай бөгөөд халдвар авахаас урьдчилан сэргийлэх магадлалтай нимгэн зэсэн бүрхүүлийг боловсруулжээ.

Энэхүү зэсэн бүрхүүл нь хагас ариутгах нөлөөтэй учир вирусийн тоосонцор идэвхгүй болж, халдвар тараах чадвараа алддагийг тогтоожээ. Коронавирусээс урьдчилан сэргийлэх хэрэглээний хүрээнд үүнийг амны хаалтынхаа дээр зүүж болох ба, эсвэл гэрлийн унтраалга зэрэг гадаргуу дээр тавин, халдварын тархалтын эсрэг ашиглаж боломжтой гэнэ.

АНУ-д хийсэн судалгаанаас харахад коронавирус зэсэн гадаргуу дээр дөрвөн цаг хүртэл идэвхтэй байдаг байна. Нөгөөтэйгүүр хуванцар болон зэвэрдэггүй ган гадаргуу дээр 48-72 цаг хүртэл идэвхтэй байдаг аж. Уг бүтээгдэхүүн удахгүй зах зээлд гарах бөгөөд олон төрлийн бүтээгдэхүүнтэй хавсарган хэрэглэх боломж олдоно гэж зохион бүтээгч нар нь найдаж байна.

Харин БНСУ-ын Засгийн газар саяхан зуны улиралд тохирох нимгэн амны хаалтыг зах зээлд нэвтрүүлэхээр баталжээ. Орон нутгийн үйлдвэрлэгч эдгээр амны хаалтуудыг энэ баасан гарагаас цахимаар худалдаалж эхлэхээр төлөвлөж байгаа бөгөөд урьдчилсан байдлаар ширхэг бүр нь 500 воны үнэтэй байх төлөвтэй байна.

Эдгээр амны хаалт нь одоогийнх шиг нүүрийг хэт барьсан биш, илүү хөнгөн бөгөөд агаарыг сайн нэвтрүүлдэг аж. Нарийн ширхэгтэй тоосоос сайн хамгаалж чадахгүй ч шүлсний дуслыг хангалттай хязгаарлана. Мөн электростатик шүүлтүүрийн хоёр давхар бүрхүүлтэй ба одоо өргөнөөр хэрэглэгддэг эрүүл мэндийн амны хаалтуудын жингийн талд ч хүрэхгүй гэжээ.

Эх сурвалж: mainichi.jp, imnews.imbc.com

---