Францын сүүлчийн хатны аяллын цүнх 44,000 еврогийн үнэ хүрчээ

Франц улсын сүүлчийн хатан хаан Мари Антуанеттын эдэлж хэрэглэж байсан аяны цүнхийг дуудлага худалдаагаар зарахад тооцоолж байснаас тав дахин илүү өндөр үнэд хүрчээ. Дуудлага худалдааг хатан хааны нэгэн цаг үед амьдарч байсан Версалийн ордны ойролцоо зохион байгуулсан байна.

Францын хувьсгалаар цаазлуулсан Австрид төрсөн хатны эд зүйлийг Осенат дуудлага худалдааны ордон гар утсаар болон интернэтээр үнэ хаялцуулан худалджээ. Арьсан цүнхийг 8,000-10,000 еврогийн үнэд хүрнэ гэж таамагласан ч 43,750 евро буюу 40,000 фунт стерлингийн үнэ хүрсэн байна.

Мөн хатны хэрэглэж байсан сараана цэцгийн тэмдэг, навчин титмээр чимэглэж, голдоо сарнай цэцгийн баглаа хатгасан Дамаскийн алчуур 14,500 еврогоор зарагджээ. Түүнчлэн Мари Антуанеттын нөхөр, хувьсгалын үед цаазаар авахуулсан 16 дугаар Луис хааны үс 4,000 еврогоор зарагдсан байна.

Хаан Луис болон хатан Антуанетт нар Францын түүхийн баатарлаг ихэс дээдэстнүүд бөгөөд хааны үсийг зүрхэн хэлбэртэй болор чулуун зүүлтэнд хадгалж иржээ.

Эх сурвалж: The Guardian