Дэлхий даяар тархаад буй коронавирусийн тахлын улмаас автомашины салбарт эрэлт, үйлдвэрлэлийн тасралт үүссэнээр Toyota Motor-ийн энэ оны үйл ажиллагааны орлого нь 80 хувиар буурах төлөвтэй байгааг тус компаниас өнөөдөр албан ёсоор мэдэгдлээ.

Toyota компанийн ерөнхийлөгч Тоёода Акио “Коронавирусийн тахлын үзүүлсэн цохилт 2008 оны дэлхийн санхүүгийн хямралын дараагаар туулсан бэрхшээлээс хамаагүй том байна. Гэхдээ халдварын тархалт буурах үед дэлхийн хоёр дахь том автомашин үйлдвэрлэгч бид эдийн засгийн сэргэлтийн тэргүүлэгч болж чадна” гэв.

Тус компанийн энэ жилийн борлуулалтын орлого 20 хувиар буурч, 24 их наяд иенд хүрэх бол нийт борлуулалтын хэмжээ 22 хувиар буурч, 7 сая орчим автомашин болжээ.

Японы хамгийн том автомашин үйлдвэрлэгч Toyota тахлын улмаас дөрөвдүгээр сарын дунд үе гэхэд 20 орны 27 үйлдвэрээ хаагаад байгаа юм.

Өнөөдөр хийсэн мэдэгдлийн дагуу Toyota-гийн энэ гуравдугаар сар хүртэл сүүлийн 12 сарын цэвэр ашиг нь 2,076 их наяд иен буюу өмнөх оныхоос 10.3 хувиар буурсан бол нийт орлого нь нэг хувиар буурч 29.9 их наяд иен болжээ.

Харин өрсөлдөгч Honda-гийн цэвэр ашиг нь 25.3 хувиар буурч, 455.7 тэрбум иен болсон бол орлого нь зургаан хувиар буурч, 14.9 их наяд иен болсон байна.

Эх сурвалж: Nikkei Asian Review

---