Өмнөд Солонгост тавдугаар сарын 6-наас эхлэн хөл хорионы дэглэмийг сулруулж, аж ахуйн нэгжүүдийн үйл ажиллагааг үе шаттайгаар нээхээр төлөвлөж байна.

Ерөнхий сайд Жонг Сэ Гюн тус улс коронавирусийн дэгдэлтийг хангалттай хяналтдаа авсан гэж үзэн, энэхүү шийдвэрийг гаргажээ. Тэрээр "Одоог хүртэл хаалттай байсан бизнесүүдийг үе шаттайгаар эргэн нээх ба халдваргүйжүүлэлтийн дүрмийг дагаж мөрдсөн олон нийтийн цугларалт, арга хэмжээг зохион байгуулахыг зөвшөөрнө" хэмээн зарлав.

Түүнчлэн номын сан, музей, спортын талбай, цэцэрлэгт хүрээлэнгүүдийг ч нээж эхлэх аж. Мөн энэ сарын 13-наас төгсөх ангийн сурагчдаас эхлэн сургуулиудыг үе шаттайгаар, аажмаар нээнэ.

Гэвч засгийн газраас анхаарал болгоомжоо сулруулаагүй хэвээр байгаагаа мөн мэдэгдлээ. Иргэдийг олон нийтийн газар бие биеэсээ зай барьж, гараа тогтмол угаан, ямар нэгэн хэлбэрээр бие нь тавгүйтсэн бол 3-4 хоног гэрийн дэглэм барихыг зөвлөжээ.

Өнөөдрийн байдлаар Өмнөд Солонгост коронавирусийн 12 шинэ тохиолдол бүртгэгдсэнээс 11 нь гадаадаас зөөвөрлөгдөж ирсэн нь хорио цээрийн дэглэмээ үе шаттайгаар сулруулахад хүргэжээ.

Эх сурвалж: Reuters

---