Амны хаалттай гүйж байсан хоёр хятад сурагч нас баржээ
БНХАУ-д биеийн тамирын хичээлийн үеэрээ амны хаалт зүүн гүйж байсан хоёр сурагчийн зүрх нь гэнэт зогсож, нас баржээ.
Хоёр өөр хотод амьдардаг байсан сурагчид хоорондоо ердөө долоо хоногийн зайтай нас барсан аж. Дөрөвдүгээр сарын 24-нд Хенань мужид, дараа нь дөрөвдүгээр сарын 30-нд Хунань мужид хоёр эрэгтэй сурагч сургуулийнхаа гүйлтийн зам дээр гэнэт ухаан алдан унаж, амьсгал хураажээ.
Биеийн тамирын хичээлийн үеэр амны хаалт зүүсэн нь тэднийг нас барахад хүргэсэн гэсэн урьдчилсан дүгнэлт гарсны дараа Хятадын боловсролын удирдлагууд энэ хичээлийн улиралд гүйх дасгалыг цуцалжээ.
Хенань мужид нас барсан талийгаачийн аав нь хяналтын камерын бичлэгийг үзсэнийхээ дараа “Тэр амны хаалт зүүгээд гүйж байгаад гэнэт дагзаараа арагш савж, толгойгоо газарт цохисон. Тэр өдөр нартай байсан, биеийн тамирын хичээл үдээс хойш орж байхад дор хаяж +20 градус байсан. Амны хаалт зүүгээд гүйхэд тухтай байгаагүй л болов уу” гэжээ.
Түүний хүүгийн үхлийн шалтгааныг орон нутгийн эмнэлгээс “гэнэтийн зүрх зогсолт” хэмээн тодорхойлсон байна. Гэвч тэрээр хүүгийнхээ биед задлан шинжилгээ хийхийг зөвшөөрөөгүй тул түүний үхэлд амны хаалт хамааралтай эсэхийг тогтоох боломжгүй болоод байгаа юм.
Сурагчдыг биеийн тамирын хичээл дээр нь амны хаалт зүүлгэн дасгал хөдөлгөөн хийлгэж байгааг шүүмжилсэн иргэд олон байгаа ч мэргэжилтнүүд өөр бодолтой байна. Тэд эдгээр сурагчид зөвхөн амны хаалт зүүсний улмаас нас барсан байх боломжгүй, харин ямар нэгэн оношлоогүй зүрхний өвчинтэй байсан байж магадгүй гэж үзэж байгаа гэнэ.
Амны хаалт зүүсэн нь үнэхээр үхлийн шалтгаан байсан эсэхийг зөвхөн задлан шинжилгээгээр баттай мэдэх боломжтой бөгөөд Хунань мужид нас барсан сурагчийн биед задлан шинжилгээ хийх эсэх нь одоогоор тодорхойгүй байна.
Эх сурвалж: The Korea Times, Daily Mail
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.