Нийтэлсэн:   Ш.Лхагва

4 жилийн өмнө

Хар тамхи, мансууруулах бодис, тэр дундаа “мөс” гэсэн нэршилтэй бодис наймаалдаг бүлэглэлийн толгойлогч “Базук” хочит Б.Баяртогтохын тухай мэдээлэл манай сайт болон телевизээр цацагдсан. Үүнтэй холбогдуулж, “Базук” хочит Б.Баяртогтох манай редакцид хандаж, зарим мэдээлэл нь үнэнд нийцэхгүй байна гэсэн гомдлыг гаргасан юм. Түүнээс зарим мэдээллийг тодрууллаа.

-Өөрийг чинь баривчилж байгаа бичлэгийг ЦЕГ-аас олон нийтэд хүргэсэн. Өөрийг чинь хар тамхины бүлэглэлийн толгойлогч гэдгийг хүлээн зөвшөөрөх үү?

-Ямар ч тийм зүйл байхгүй. Энэ бол С.Азжаргал, А.Хишгээ нарын гаргасан л яриа. Цагдаад тийм утгатай мэдүүлэг өгсөн байна лээ. Надтай цуг баригдсан дөрвөн хүн бол бүгд гэр бүлийн хүмүүс. С.Азжаргалын нөхөр Мандхай, А.Хишгээгийн нөхөр П.Эрдэнэдалай. С.Азжаргал, А.Хишгээ хоёр нь эгч дүү. Бүгд олон жил хэрэглэж байгаа, бүгд зардаг. Харин сүүлд Мандхай нь салсан гэж сонссон. Эд нар л намайг бүлэглэлийн толгойлогч гэдэг ойлголтыг нийгэмд өгөөд байгаа юм. Үнэндээ бол тийм биш.

Баригдахын өмнөх өдөр би найзуудтайгаа амралтанд явж ууж идсэн. Залуу хүмүүст ийм зүйл байдаг шүү дээ. Гэртээ жаахан шартангуй хэвтэж байтал С.Азжаргал гэнэт хүрээд ирсэн. Очлоо барилаа гэж хэлээгүй, гэнэтхэн хүрээд ирсэн. Тамхи авах уу? гэсэн. Би мөнгө алга гэсэн. Сейфинд уг нь мөнгө байсан. Би “Адидас” брэндийн хувцас оруулж ирж зардаг. Өөрөө ч хэрэглэх дуртай.

Гэтэл “Татах уу?” гэсэн. Би шартангуй байсан болохоор жаахныг татсан. Түрийвчиндээ байсан 130 мянган төгрөгийг өгсөн. Баривчлагдсаны дараа шээсний шинжилгээгээр татсан нь тогтоогдсон. Нуугаад байх зүйл байхгүй. Тэгээд С.Азжаргал надад бараагаа үлдээгээд явсан. Эргэж авна гээд. Гэтэл түүнийг гарч явсны дараа цагдаа нар гэнэтхэн ороод ирсэн.

-Чамайг жирэмсэн эмэгтэйчүүдээр хар тамхиа зөөлгөдөг байсан гэсэн мэдээлэл байна?

-Ёстой тийм юм байхгүй. Тухайн үед С.Азжаргал нь жирэмсэн байсан. А.Хишгээ нь ч жирэмсэн байсан байх. Эндээс л ийм яриа гарсан. Ганц худагт хоригдож байхад С.Азжаргал надтай таараад “Надаас худалдаж авсан гэж битгий хэлээч. Тэгэхээр миний хэрэг хүндрэх гээд байна” гэсэн. Энэ нь хэрэв мөнгөөр зарсан бол хэрэг нь хүндэрнэ гэсэн санаа. Би өөрөөр мэдүүлэг өгсөн. Одоо миний яллах тогтоол өөрөөр явж байгаа.

Гэтэл одоо С.Азжаргал нь оргон зайлсан. Орон даяар эрэн сурвалжлагдаад олдохгүй, шүүх хурал маань хойшлогдоод байгаа.

-Өмнө нь хулгайн хэргээр ял авч байсан гэсэн байна?

-Надад хулгай хийсэн, ял авсан тохиолдол байхгүй. Та нар бас хүнийг ингэж бичиж болохгүй. 19 насандаа би танхайн хэргээр шалгагдаж байсан минь үнэн. 2018 онд авто осол гаргаад, хоёр жилийн тэнсэн авсан байсан. Тэнсэнтэй хугацаандаа ингээд баригдсан учраас одоо гарцаагүй ял авах болчихоод байгаа юм.

-Чамайг олон жил хар тамхи худалдаалж байгаа. “Х апартмент”-д авсан байраа хар тамхи зарж олсон мөнгөөрөө худалдаж авсан гэсэн мэдээлэл байна?

-Ёстой тийм зүйл байхгүй. Миний ах, эгч нар бүгд гадаадад байдаг. Би бизнес хийдэг тухай дээр дурдсан. Тэндээс олсон орлого болон ах, эгчийн илгээсэн мөнгийг нийлүүлж байж байр авч байсан.

-Хар тамхиа зарах, бараатай гэдгээ хэрэглэгчдэдээ мэдүүлэхийн тулд питбул нохойнуудаа дагуулж явдаг гэсэн тухайд?

-Би нохой тэжээдэг, нохойнд дуртай. Гэхдээ би питбул биш, Бүлл терриер тэжээдэг. Бүлл тиррер тэжээгчдийн холбоо байгуулсан. Бид нар тэмцээн, уралдаан зохиохоос гадна сайн үйлсийн аян ч зохион байгуулдаг.

Хар тамхиа зарах гэж нохой дагуулж явсан зүйл байхгүй. Та нар бас хүнийг ингэж гүтгэж болохгүй шүү дээ. Ер нь шүүх хурал болоогүй байхад хүнийг ингэж бичиж болдог юм уу?!

Сурталчилгаа