Японд хүүхдийн тоо түүхэндээ хамгийн доод хэмжээнд хүрэв
Нийт хүн амд эзлэх хүүхдийн тоо 39 дэх жилдээ дараалан буурсан талаар даваа гарагт Япон улсын Засгийн газраас мэдээллээ.
Төрөлт буурсаар байгаа энэхүү ужгирсан асуудлыг шийдвэрлэхэд тус улсаас ихээхэн хүчин чармайлт гаргасаар байгаа ч энэ удаагийн үзүүлэлтээр хүн амын дунд эзлэх хүүхдийн тоо хамгийн доод хэмжээнд хүрсэн байна.
Энэ оны дөрөвдүгээр сарын 1-ний байдлаар Японд 14 ба түүнээс доош насны 15.12 сая хүүхэд байгаа нь өмнөх оны үзүүлэлтээс 200 мянгаар буурсан бөгөөд 1950 онд анх бүртгэж эхэлснээс хойших хамгийн бага үзүүлэлт болжээ.
Үүнтэй харьцуулахад 65 ба түүнээс дээш насны хүмүүс Японы хүн амын 28.6 хувийг эзэлдэг. 1954 онд хүүхдийн тоо 29.89 саяд хүрч байсан нь хамгийн өндөр үзүүлэлт байсан бөгөөд 1982 оноос хойш буурсаар энэ хүрчээ.
Япон улсын Ерөнхий сайд Шинзо Абэ нийгэм дэх эмэгтэйчүүдийн байр суурийг дээшлүүлэх, өдөр өнжүүлэх төвүүдийн тоог нэмэгдүүлэх зэрэг арга хэмжээгээр өтөлж буй хүн амын эсрэг тэмцэхээ амлаж байсан. Гэвч түүний энэ хүчин чармайлт хараахан үр дүнгээ өгч эхлээгүй байна.
Эх сурвалж: The Mainichi
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.