ОХУ-д 14 хоногт гурван эмч цонхоор унажээ
Эх сурвалжийн мэдээлснээр өнгөрсөн хоёр долоо хоногийн хугацаанд ОХУ-д коронавируст цар тахалтай галын шугаманд тэмцэж байсан гурван ч эмч учир битүүлэг шалтгаанаар эмнэлгийн цонхноос унасан хэрэг гарчээ.
Халдварын тохиолдол 145,000 давж, 1,400 орчим иргэн нас бараад байгаа хойд хөршид эмч мэргэжилтнүүдийн ажиллах орчин олон нийтийн анхаарлыг татаад байгаа юм. Өнгөрсөн хагас сард цонхоор унасан хоёр эмч нас барсан бол нэг нь хүнд бэртэн эмнэлэгт хэвтжээ.
Москва хотоос урагшаа 400-аад км-т байдаг Воронеж хотын түргэн тусламжийн эмч Александр Шулепов өнгөрсөн дөрөвдүгээр сарын 22-ны өдөр коронавирусээр халдварлажээ. Гэвч тэрээр халдвар авч эмчлүүлэх шаардлагатай байсан ч ажилдаа эргэн орсон байна. Энэ талаар түүний хамтрагч Александр Косяакин видео бичлэг хийж олон нийтийн цахим сүлжээнд байршуулжээ.
Орон нутгийн телевизийн мэдээлснээр Шулепов Новосманскаяа эмнэлгийн хоёр давхрын цонхоор унаж бэртэл авсан байна. Харин Косяакин эмнэлгийн ажилтнуудыг хамгаалах хувцас хэрэглэл дутмаг байгаа талаар цахим орчинд нийтэлсний дараа хуурамч мэдээлэл тараасан хэргээр цагдаагийн газарт байцаагджээ.
Энэ явдлаас өмнө тавдугаар сарын 1-ний өдөр Сибирийн Красноярск хотын эмнэлгийн тасгийн эрхлэгч эмч Элена Непомнящаяа цонхоор унаж, долоо хоног эрчимт эмчилгээний тасагт хэвтэж байгаад амьсгал хураажээ. Тэрээр учир битүүлгээр цонхоор унахаасаа өмнө эмнэлгийн хэвтэн эмчлүүлэх тасгийг коронавирустэй өвчтөнүүдэд зориулахаар төлөвлөсөн ч тоног төхөөрөмж, хамгаалалтын хэрэгсэл хомс тул эсэргүүцэж байжээ.
Түүнчлэн дөрөвдүгээр сарын 24-ний өдөр Стар хотын яаралтай түргэн тусламжийн тасгийн дарга Наталья Лебедева цонхоор унаж эмнэлэгт нас баржээ.
Эх сурвалж: CNN
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.