-Коронавирусээс урьдчилсан сэргийлэхийн зэрэгцээ үйл ажиллагаагаа хэвийн явуулах аргыг бизнесмэнүүд бодож олж чадна-

Fast Retailing-ийн ерөнхий захирал Тадаши Янай нэгэн удаа “Бизнесийн менежмент бол номыг хойноос нь уншихтай адил буюу эхлээд юунд хүрэхээ мэдсэний дараа түүнд хэрхэн хүрэхээ шийдэх нь чухал” хэмээн онцолж байсан билээ.

Тадаши Янай 1984 онд Uniqlo брэндийг үүсгэн байгуулж, Fast Retailing-ийг дэлхийн гурав дахь том хувцас хэрэглэлийн борлуулагч болгон өргөжүүлсэн юм. Эдийн засгийн хямралуудын үед компаниа удирдаж байсан туршлагатай тэрээр бизнес эрхлэгчдийг тахлын үеэр үйл ажиллагаагаа үргэлжлүүлэх илүү сайн арга зам олохыг уриалав.

Тэрээр Nikkei-д өгсөн ярилцлагадаа “Засгийн газрууд тахлын дэгдэлтийг хяналтдаа авахаар ажиллаж байх үеэр дэлхийн эдийн засаг бүрэн зогсох ёсгүй” гэв. Хэрэв тэгвэл эргэн сэргэлт илүү удаан, илүү их асуудалтай болно гэлээ.

Түүний үзэж буйгаар улс орнуудын засгийн газрууд коронавирусийг ялахын тулд олон нийтийн өдөр тутмын амьдрал, тэр тусмаа эдийн засгийг золиослох ёсгүй аж. “Хэн ч мөнгө олохгүй бол хэн ч амьд үлдэж чадахгүй” гэж энэ санаагаа тодотгожээ.

Тадаши Янай цааш нь “Засгийн газрууд яагаад компаниудыг үйл ажиллагаагаа зогсоохыг шаардаж байгааг би ойлгож байна. Гэхдээ компаниуд хаалгаа барихаас илүү сайн шийдэл гаргаж чадна. Тэд коронавирусээс урьдчилан сэргийлэхийн зэрэгцээ бизнесийн үйл ажиллагаагаа үргэлжлүүлэх арга замыг бодож олох хэрэгтэй. Хэрэв эдийн засаг уналтад орвол нийгэм бүхэлдээ сүйрэх болно. Энэ бол бодит байдал” хэмээв.

БНХАУ-д халдварын тархалт дээд цэгтээ хүрээд байх үед тус улс дах Fast Retailing-ийн дэлгүүрүүдийн 390 орчим буюу бараг тал хувь нь хаагджээ. Одоо тэдний ихэнх нь буцаад нээгдсэн боловч орлого нь өмнөхөөсөө 30-40 хувиар буураад байгаа аж.

“Үйлчлүүлэгчид удаан хугацаагаар хаагдсан дэлгүүрүүдэд эргэж ирдэггүй. Эдийн засгийн үйл ажиллагаа нэгэнт зогсвол эргэн хэвийн ажиллаж эхлэхэд маш их хугацаа орно” гэж ноён Тадаши өгүүлэв.

Эх сурвалж: asia.nikkei.com

---