Архидан согтуурах явдал нь гэмт хэргийн шалтгаан нөхцөл болохоос гадна гэр бүл салалтын шалтгаан болж байна

Монголын хуульчдын холбоо, Хууль зүйн дотоод хэргийн яам, Гэмт хэргээс урьдчилан сэргийлэх зөвлөл хамтран өнөөдөр архидан согтууралтаас үүдэлтэй гэмт хэргийн шалтгаан нөхцөл, хэрхэн урьдчилан сэргийлэх талаар хэлэлцүүлэг зохион байгуулав.

Монголын Хуульчдын холбооны Эрүүгийн эрх зүйн хорооны тэргүүн Л.Галбадар “Архидан согтуурах явдал нь гэмт хэргийн шалтгаан нөхцөл болохоос гадна гэр бүл салалтын шалтгаан болж байна. Архины донтолтыг сэтгэлзүйн аргаар эмчлэх нь зүйтэй байгаа” хэмээв.

Манай улсад албадан эмчилгээг олон жил хийж байгаа ч төдийлөн үр дүн гарахгүй байгаа юм. Архидан согтуурлаас урьдчилан сэргийлэх асуудлыг 10 жилийн сургалтын хөтөлбөрт хамруулж, архи уувал хүний элэг, нойр булчирхайд ингэж нөлөөлнө хэмээн бодиттойгоор сургалтад оруулах хэрэгтэй хэмээн үзэж байна.

Улсын хэмжээнд өнгөрсөн онд 32259 гэмт хэрэг бүртгэгдсэнээс 4012 буюу 12.4 хувийг согтуугаар үйлдэгдсэн гэмт хэрэг эзэлжээ.

Сүүлийн үед эрүүлжүүлэгдсэн болон албадан эмчлэгчдийн тоо буурсан гэж тоон үзүүлэлт гарсан байгаа нь механик үзүүлэлт гэдгийг албаны хүмүүс дурдсан бөгөөд монголчуудын архины хэрэглээ багасаагүй хэмээв. Өнөөдрийн байдлаар 391 хүн тутамд нэг худалдаа үйлчилгээний цэг ногдож байна.

Архинд донтох өвчний эмчилгээний гол арга сэтгэл заслын эмчилгээ байх бөгөөд хордлого тайлах болон биеийн ерөнхий байдал сэргээх эмчилгээг хавсран хийдэг байна. Япон улсад архинд хамааралтай хүний эдгэрэлтийн байдлаас хамаарч 1-3 жилийн хугацаанд нийгмийн халамжид суурилсан хөтөлбөрт хамруулдаг байна. Түүнчлэн тухайн хүнийг архичин болсон гэдгийг хүлээн зөвшөөрүүлэх нь эмчилгээнд сайн нөлөөтэй хэмээн албаны хүмүүс ярьсан юм.

Хэлэлцүүлгийн үеэр нийгэмшлийн орчны нөлөөллийг бууруулах, уламжлалт баяр ёслол, тэмдэглэлт өдрийг согтууруулах ундаагүй өнгөрүүлэх, иргэдийн хууль, эрх зүйн мэдлэгийг дээшлүүлэх чиглэлээр нөлөөллийн ажил байнга явуулах, ялангуяа, өсвөр үе, залуучуудыг согтууруулах ундааны хэрэглээнээс хол байлгах шаардлагатайг оролцогчид онцолж байлаа.

---