Судалгаа: 10 мянга гаруй иргэн ажилгүй болчихвол 72 хувь нь хадгаламжгүй байна

Монголын үндэсний худалдаа аж үйлдвэрийн танхимын хийсэн судалгаагаар, коронавирусийн халдварын улмаас 260 мянган ажлын байр буюу 260 мянган өрх ажилгүй, орлогүй болоход бэлэн байна гэдгийг судалсан. Нөхцөл байдал энэ оны 2-р улиралд үргэлжилсэн тохиолдолд ААН-үүдийн 30 хувь нь нийт 8000 орчим тооны ажлын байрыг цомхотгох төлөвлөгөөтэй байгаа гэсэн судалгааг өнгөрсөн сард гаргасан байдаг. Одоогийн байдлаар нийтдээ 6000 орчмоор ажлын байрны тоо буураад байна.

Хамгийн сүүлд МҮХАҮТ-ын судалгаанд хамрагдсан 10 мянга гаруй иргэн хэрвээ ажилгүй болчихвол 72 хувь нь хадгаламжгүй, 14 хувь нь 30 хоног, найман хувь нь гурван сар хүртэл амьдрах мөнгөтэй байна гэжээ.

Түүнчлэн гэр бүлийн аль нэг гишүүн ажлаас халагдсан тохиолдолд өөрсдийн хадгаламжаар ямар хугацаанд амьдрах талаар асуухад 1-3 сарын хугацаанд хадгаламжийн мөнгөөрөө амьдрах боломжтой хэмээсэн байна.
Хадгаламжгүй, хуримтлалгүй иргэн, аж ахуйн нэгж хямрал хүндрэлийг тэсэхэд бэрх. Хувийн хэвшлийг төлөөлөх танхимын зүгээс Засгийн газарт хандаж, иргэдээ ялгаварлалгүй ажилтай, орлоготой байлгах бүхий л арга хэмжээг авах хэрэгтэй байгааг сануулсан. Нийгэм, эдийн засгийн ачааны хүндийг үүрч, төсвийн орлогыг бүрдүүлж, хөдөлмөрийн зах зээлд хамгийн том ажил олгогч байж ирсэн хувийн хэвшлийн дийлэнх нь хураасан хадгаламжгүй. Өөрөөр хэлбэл, дунд болон урт хугацааны эдийн засгийн хямралыг төвөггүйхэн туулаад гарах хэмжээний эрсдэл даах бэлэн мөнгөний хуримтлалгүй байна.