Ардчилсан намын ҮБХ-ны гишүүн Д.Мөнх-Эрдэнэ 100 сая төгрөгөө тушаасан 180 эрхмийн нэрийг зарлахад дунд нь МАХН-ын гишүүн О.Баасанхүүгийн нэр дурайж байсан билээ.

Энэхүү хэвлэлийн хурлын дараа О.Баасанхүү Төрийн ордонд “Намайг өөр намын дансанд мөнгө хийсэн гэж гүтгэсэн байна. Миний хувьд МАН, АН, Үнэн ба зөв намуудад мөрийн хөтөлбөрийн саналаа өгсөн. Миний саналууд эдгээр намын мөрийн хөтөлбөрт тусаж байгаа бол би нэр дэвших боломжтой” гэж мэдэгдэж байсан билээ.

Гэвч тэрээр гүтгэлэг хэмээн мянгантаа мэдэгдсэн ч үнэнд гүйцэгдэв бололтой. Ардчилсан намын эх сурвалж “О.Баасанхүү манай намаас нэр дэвшинэ. Орхон аймгаас нэр дэвших болов уу” гэж мэдээллээ.

Ардчилсан намын мөрийн хөтөлбөр, О.Баасанхүүгийн санал хоёр эвийн цавуу шиг нийлсэн бололтой. Ямартай ч тэрээр бие дааж нэр дэвшихгүй боллоо.

---