Урт цагаан үйлчилгээний төвийн түрээслэгчид ус, цахилгаан тасалсныг эсэргүүцэн жагслаа

Урт цагаан үйлчилгээний төвийн халуун, хүйтэн усны шугам энэ сарын эхээр задарч, 820 м.куб ус уг барилгын хөрсөн доогуур алдагдсан байна. Нийслэлийн Өмчийн ашиглалт удирдлагын газраас дулааны шугам сүлжээний газарт дуудлага өгснөөр мэргэжлийн хүмүүс ирж гуравдугаар сарын 16-ны өдөр усыг нь хаажээ. Харин өнгөрсөн даваа гарагаас эхлэн урт цагааны халаалт, халуун хүйтэн усыг хаасан бол өнөөдөр цахилгааныг түр тасалсан юм.

Тэгвэл Урт цагаан үйлчилгээний төвийн түрээслэгчид ус, цахилгааныг хааснаар бид нарыг хүчээр шахуу хөөн гаргаж байна хэмээн өнөөдөр эсэргүүцэн жагслаа. 

Шүүхээс нийслэлийн Засаг даргын захирамжийг хүчингүй болгосон. Энэ үйлчилгээний төвд амьжиргаагаа залгуулдаг болон хүн ажиллаж хөдөлмөрлөдөг гэдгийг ойлгохгүй шууд хүчээр ингэж боомилж болохгүй хэмээн эсэргүүцлээ илэрхийлж байна.

Урт цагаан үйлчилгээний төвийн дулааны нэг, халуун хүйтэн усны хоёр шугам задарч тус төвийн барилгын доор ус тогтоод байгаа юм. Үйлчилгээний төвийн барилгын доор их хэмжээний ус тогтсон тул барилгад суулт өгч хэзээд нурахад бэлэн болсон тул иргэд, түрээслэгчдийн аюулгүй байдлыг хангах үүднээс цахилгааныг өнөөдөр тасалсан гэдгийг холбогдох албаны хүмүүс дурдлаа.

Тэгвэл Урт цагаан үйлчилгээний төвийн түрээслэгч нар өөр байр суурьтай байгаа юм. Нийслэлийн Засаг дарга С.Амарсайхан Урт цагааны үйл ажиллагааг хоёрдугаар сарын 21-нээс зогсоох захирамж гаргасныг Нийслэлийн Өмчийн ашиглалт удирдлагын газраас танилцуулсан. Уг захирамжийг эсэргүүцэн урт цагааны түрээслэгчид Захиргааны хэргийн шүүхэд хандсан. Шүүхээс Нийслэлийн Засаг даргын захирамжийг түдгэлзүүлэх шийдвэр гарсан байна. Уг шүүхийн шийдвэрийг биелүүлэхийг эсэргүүцэж Урт цагаан үйлчилгээний төвийн ус, цахилгааныг тасалсан хэмээн түрээслэгч нар үзэж байгаа юм. Түрээслэгчдийн ажилд санаатайгаар саад учруулсан хэмээн өнөөдөр зам хааж, эсэргүүцлээ илэрхийллээ.