Хар тамхитай холбоотой таван гэмт хэрэг илрүүлжээ
Цагдаагийн ерөнхий газрын Хар тамхитай тэмцэх газраас мансууруулах эм, сэтгэцэд нөлөөт бодисыг улсын хилээр хууль бусаар нэвтрүүлдэг, зарж борлуулдаг зохион байгуулалттай этгээдүүдийг олж тогтоох, баривчлах ажиллагааг тогтмол явуулдаг. Мөн аливаа мансууруулах, сэтгэцэд нөлөөт бодисыг борлуулагдахаас өмнө хураан авах, таслан зогсоох ажлыг зохион байгуулдаг. Тэгвэл Хар тамхитай тэмцэх газрын алба хаагчид өнгөрсөн сард явуулсан тусгай ажиллагаагаар хар тамхи улсын хилээр хууль бусаар нэвтрүүлсэн хоёр, бусдад худалдсан болон худалдахыг завдсан долоон этгээдэд холбогдох таван гэмт хэргийг илрүүлжээ. Улмаар эд мөрийн баримтыг хураан авч эрүүгийн хэрэг үүсгэн шалгаж байгаа аж.
Уг ажиллагааны хүрээнд эд мөрийн баримтаар хураагдсан химийн гаралтай сэтгэцэд нөлөөт бодисыг олон улсад ашиглагддаг “Хүний нэг удаагийн хэрэглээний дундаж тун хэмжээ”-гээр тооцоолоход 2123 хүний нэг удаагийн хэрэглээг таслан зогсоож, хууль бус эргэлтэд нийлүүлэгдэхээс урьдчилан сэргийлсэн байна. Түүнчлэн мансууруулах эм, сэтгэцэд нөлөөт бодисын хууль бус эргэлттэй холбоотойгоор сэжигтэй объект, байр байгууламжид тогтмол хяналт тавьж, илрүүлэх, таслан зогсоох ажиллагааг явуулж байгаа аж. Энэ хүрээнд тусгай ажиллагаа явуулж мансууруулах бодисын хууль бус хэрэглээтэй холбоотой мөрийтэй тоглоомын газар, зочид буудал, орон байр зэрэг гурван газрыг илрүүлжээ.
Г.Ган-Эрдэнэ
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.