Ж.Трамп энэ улирлын зургаа дахь түрүүгээ хүртлээ

Мэргэжлийн снукер биллиардын дэлхийн чансаа олгох Гибралтарын нээлттэй тэмцээн хаалттай орчинд явагдаж дууслаа. 

Коронавирусийн халдварын улмаас тэмцээнд оролцохоор оноолтод ороод байсан хэд хэдэн топ тамирчид оролцохоос татгалзсан тул дэлхийн чансааг тэргүүлэгч Ж.Трамп төвөггүйхэн түрүүллээ. Снукер биллиард сонирхогчдын урьдчилсан таамгийн дагуу финалд Ж.Трамп болон К.Вилсон нар тунан үлдсэн ба тэдний тоглолт өрсөлдөөнтэй явагдлаа. Финалын тоглолтын өмнө хоёр тамирчны хувьд өмнө нь 14 удаа учраа тааран тоглохдоо хэн хэнийгээ тус бүр долоо хожоод байсан тул энэ удаагийн учраа нь хайнаа хагалах шийдвэрлэх тоглолт байлаа. Хамгийн сүүлд буюу ердөө сарын өмнө Дэлхийн гран при тэмцээнд таарахдаа К.Вилсон 4:3 харьцаагаар хожсон ч энэ удаад Ж.Трамп 4:3 харьцаагаар хожил байгууллаа. 

Ийнхүү Гибралтарын нээлттэй тэмцээнд түрүүлснээр Ж.Трампын хувьд 2019-2020 улирлын зургаа дахь тэмцээндээ түрүүлж байна.