5,000 жилийн настай модоор хийсэн задгай дээвэртэй Bentley-г танилцуулав

Bentley Британийн тансаг зэрэглэлийн автомашин үйлдвэрлэгч компани задгай дээвэртэй Mulliner Bacalar нэртэй шинэ загвараа танилцууллаа. Ердөө 12 ширхэг үйлдвэрлэгдсэн тансаг автомашины дотор талын салоныг 5,000 жилийн настай модоор урлаж хоёр сая ам.долларын үнээр худалдах ажээ.

Энэ долоо хоногийн пүрэв гарагт нээлтээ хийх байсан Женевийн авто шоун дээр Bacalar-ыг танилцуулахаар төлөвлөсөн боловч дэлхийн 70 гаруй оронд тархсан коронавирусийн халдварын улмаас авто шоуг хойшлуулаад байгаа юм. Тиймээс Bentley амласан ёсоор товлосон хугацаандаа шинэ загвараа онлайнаар танилцуулжээ.

Шинэ Bacalar хүлэг Barchetta загварт багтана. Энэ нь жижиг завь гэсэн утгатай Итали үг бөгөөд нэмэлт дээвэр огт байхгүй гэсэн үг. Тиймээс та бороотой үед тансаг машинаа гараашдаа хадгалах нь хамгийн зөв сонголт ажээ. Харин Bacalar нь Мексикийн Юкатаны хойгт байдаг үзэсгэлэнт нуурын нэр юм. Дөрвөн дугуй нь хөтлөгчтэй Bacalar 650 морины хүчтэй, 12 цилиндр бүхий хөдөлгүүртэй. Хурдны найман шилжилттэй юм байна.

Машины лого тэмдгийг уламжлалт мөнгөлөг өнгөөр бус хар бараан гялтганасан өнгийг титан оролцуулан хийжээ. Дээр дурдсанчлан 12 ширхэгийг үйлдвэрлэх ба бүгд урьдчилсан захиалгад орсон буюу эздээ олсон байгаа ажээ.

Эх сурвалж: CNN