Үхрийн махны үнэ 700-1200 төгрөгөөр нэмэгджээ

Хонины ястай мах нэг килограмм нь дунджаар 9745 төгрөг, үхрийн ястай мах нэг килограмм нь дунджаар 11437 төгрөгийн үнэтэй байна. Үхрийн ястай махны үнэ өмнөх долоо хоногтой харьцуулахад 785 төгрөгөөр (7.4%), үхрийн цул махны үнэ 1271 төгрөгөөр (10.2%)-аар тус тус өссөн байна.

Энэ долоо хоногийн ажиглалтаар үхрийн ястай мах “Хүчит шонхор” хүнсний захад хамгийн хямд буюу 9500 төгрөг, Харин “Меркури” хүнсний захад хамгийн өндөр үнэтэй буюу 14000 төгрөг байна. Өмнөх долоо хоногтой харьцуулахад хонины ястай махны үнэ 1058 төгрөгөөр (12.2%), харин хонины цул махны үнэ 1055 төгрөгөөр (12.1%)-аар тус тус өсжээ. Энэ долоо хоногийн ажиглалтаар хонины ястай мах “Хүчит шонхор” хүнсний захад хамгийн хямд буюу 8500 төгрөгөөр, харин “Меркури” хүнсний захад хамгийн өндөр үнэтэй буюу 13000 төгрөгөөр худалдаалж байна.

Нийслэлийн хүнсний томоохон зах, дэлгүүрт “Алтан тариа” савласан нэг кг гурилын үнэ дээд зэрэг нь 1730-2500 төгрөг, 1-р зэргийнх 1100-1500 төгрөг, 2-р зэргийнх 800-1100 төгрөг байна. 

Өмнөх долоо хоногтой харьцуулахад монгол лууван 0.5 хувиар өсч 1544 төгрөг, байцай 0.5 хувиар өсч 1613 төгрөгөөр тус тус худалдаалагдаж байна.