Дэлхийн улс орнууд Уханиас иргэдээ нүүлгэн шилжүүлж байна

Хятадын Ухань хотыг шинэ төрлийн коронавирусийн халдварын голомт гэж үзэж, тэнд тусгаарлагдсан ард иргэдээ эргүүлэн авчрах тухай Засгийн газрууд хоорондын яриа хэлэлцээрийг явуулж байгаа юм. Тэгвэл Америк, Япон, Австрали улсууд ард иргэдээ эргүүлэн авчирж байна.

Эхний ээлжинд Америк, Японы онгоцууд ард иргэдээ Уханиас тээвэрлэн нисчээ. Европын Комисс холбоотон улс орнууддаа иргэдээ эргүүлэн авчрахад тусална гэдгээ мэдэгдсэн байна.

Өнөөдөр өглөөний байдлаар халдварын улмаас амиа алдсан иргэдийн тоо 130 гарч, 6,000 орчим хүн халдварласан болохыг тогтоожээ. Хятадын дарга Си Зиньпин Уханиас гаралтай шинэ төрлийн вирусийг аймшигт чөтгөртэй зүйрлэж, түүнийг ялан дийлэх болно хэмээн мэдэгдсэн байна.

Хятадаас гадна дэлхийн 17 оронд халдварын 60 гаруй тохиолдол бүртгэгдсэн ч амиа алдсан тохиолдол илрээгүй.

Японы 200 гаруй иргэн Уханийг орхин гарсны дараа 650 орчим иргэн дараагийн ээлжийг хүлээн үлдэж байна. Франц улс халдварын голомтоос гарах хүсэлтэй 250 иргэнээ авчрахаар төлөвлөж яриа хэлэлцээр хийж байгаа бол Өмнөд Солонгос улс 700 иргэнээ энэ долоо хоногт багтан буцаахаар төлөвлөжээ.

Эмч мэргэжилтнүүдийн зүгээс халдварын тархалт дээд цэгтээ хүрэх хүртэл дахин 10 хоног үргэлжилнэ хэмээн сэрэмжлүүлж байна. Хүнээс хүнд халдахгүй тул амны хаалт зүүх шаардлагагүй, олон нийт тайван байх хэрэгтэй гэж Австралийн Эрүүл мэндийн яамнаас мэдэгдсэн боловч Герман, Вьетнам, Тайвань, Японд шинэ коронавирус нь хүнээс хүнд халдварлаж байгааг батлаад байгаа юм.

Эх сурвалж: The BBC