Үхсэн бугын гэдэснээс 7 кг хог гарчээ
Тайландын умард нутагт байдаг Кун Сатан үндэсний цэцэрлэгт хүрээлэнд нутагшсан зэрлэг буга үхсэн байдалтай олджээ. Бугын гэдсэн дотроос долоон кг хог хаягдал олдсон тухай албаныхан мэдээлсэн байна.
Долоон кг хогон дунд эрэгтэй хүний дотуур өмд, гялгар уут, нэг удаагийн кофены сав, гялгар утас, бэлэн гоймон, резинэн бээлий, алчуурны тасархай зэрэг байжээ. Цэцэрлэгт хүрээлэнгийн ажилтнууд бугыг үхэхээсээ өмнө удаан хугацааны туршид хуванцар хог хаягдал идсэн ба хоол боловсруулах эрхтний сувгийг тагласнаас үхсэн гэж үзжээ.
Уг мэдээлэл олон нийтэд хүрсний дараа олон нийтийн цахим сүлжээнд байгальд аялж амрахдаа хогоо хаяхгүй байж хариуцлагатай хандахыг шаардсан постууд нийтлэгдсэн байна.
Энэ оны эхэнд дюгон гэх далайн аварга өвсөн тэжээлтний бяцхан үр төл хуванцар идсэнээсээ болж үхсэн юм. Бяцхан дюгон олдсон даруйдаа тайландчуудын хайрыг татаж байсан ч хэдхэн сарын дараа үхэж, дотор гэдсийг нь задлахад хуванцар хог хаягдал олджээ.
Тайланд улс нь гялгар уутны хэрэглээгээр дэлхийд тэргүүлдэг. Жил бүр тус улсад 75 тэрбум ширхэг гялгар уут хаягддаг байна. Хүрээлэн буй орчны сайд ирэх оны нэгдүгээр сараас эхлэн нэг удаагийн гялгар уутны хэрэглээг зогсоохоо мэдэгджээ.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.