Шинэ Дэли хотод агаарын бохирдлын улмаас нислэгүүд чигээ өөрчилжээ
Энэтхэг улсын нийслэл Шинэ Дэли хотод өнгөрсөн ням гарагт агаарын бохирдол гамшгийн түвшинд хүрснээс олон улсын нисэх буудлыг чиглэсэн болон хөөрөх нислэгүүд хойшлогдож, зарим нь чиглэлээ өөрчилсөн байна.
Нийслэл хот утаанд дарагдаж үзэгдэх орчин хязгаарлагдмал болсноос 37 нислэг чиглэлээ өөрчлөн газарджээ. Агаарын бохирдлын индексээр онц аюултай түвшнийг заасан байна. Ням гарагт зөвхөн нийслэлээс гадна хойд нутагт агаарын бохирдол гамшгийн түвшинд хүрсэн гэж эрх баригчид мэдэгджээ.
Greenpeace, AirVisual байгууллагуудын гаргасан жагсаалтаар Шинэ Дэли дэлхийн хамгийн их агаарын бохирдолтой хотоор нэрлэгдсэн. Түүнчлэн хамгийн их агаарын бохирдолтой дэлхийн 10 хотын долоо нь Энэтхэг улсад байгаа юм.
Хэдийгээр үзэгдэх орчин хязгаарлагдмал үед онгоцууд газардах боломжтой ч бүх нисгэгч нар үүнд бэлтгэгдээгүй, чадвар дутах учир аюулгүй байдлын үүднээс чиглэлийг нь өөрчлөх, цуцлах хүртэл арга хэмжээ авсан гэж Шинэ Дэлигийн олон улсын нисэх буудлын албанаас тайлбар хийсэн байна.
18 сая оршин суугчтай, 8,8 сая моторт тээврийн хэрэгсэлтэй Шинэ Дэлид жил бүрийн өдийд агаарын температур унаж, фермерийн аж ахуй эрхлэгчид газраа цэвэрлэхийн тулд хатсан өвс тариагаа шатаахтай давхцан агаарын бохирдол дээд хэмжээндээ хүрдэг.
Агаарын бохирдол их байгаа хотуудын сургуулиудыг энэ долоо хоногийн мягмар гараг хүртэл хааж, сурагчдад зориулж таван сая утааны маск тараасан байна.
Эх сурвалж: www.cnn.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.