Их Британийг орхин гарах чинээлэг иргэдийн тоо өсөв
Их Британид амьдардаг Европын холбооны орнуудын чинээлэг иргэд тус улсыг орхиж эхэлсэн тухай “Bloomberg” агентлаг мэдээлжээ. “Bloomberg”-ийн сэтгүүлч Их Британиас Европт шилжин суурьшихад тусладаг агентлагийн эзэн Энтони Уорд Томастай ярилцсан байна.
Энтони Уорд Томасын хэлснээр, 2018 онд тус компанийн үйлчилгээг 300 орчим хүн авсан нь өнгөрсөн 2017 онтой харьцуулахад 82 хувиар өссөн үзүүлэлт гэнэ. Томасын үйлчлүүлэгчдийн олонх нь таван саяас дээш фунт стерлингийн хөрөнгөтэй чинээлэг европчууд бөгөөд тэдний зарим нь бизнесээ орхин гарч байгаа аж.
Европчуудын олонх нь Францын өмнөд хэсэг, Испанийн Майорк арал дээр шилжин суурьшиж байгаа гэнэ. Саятнууд ийнхүү шилжин суурьших болсны гол шалтгааныг Томас “BREXIT”-тэй холбон тайлбарлаж байна. Их Британийн парламент “BREXIT”-ийн гэрээг батлаагүйтэй холбоотойгоор шилжин суурьшигчдын урсгал цаашид нэмэгдэж магадгүй гэдгийг ажиглагчид ч онцолж буй. Түүнчлэн Олон улсын валютын сангаас “BREXIT” Их Британи, Европын холбооны аль альных нь эдийн засагт сөргөөр нөлөөлөхийг анхааруулсан.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.