Коллежийн оюутныг найз охиноосоо болж амиа егүүтгэсэн гэж үзлээ
АНУ-ын Массачусеттс мужийн Бостон коллежид суралцаж байгаад төгсөлтийн баяраасаа хэдхэн цагийн өмнө амиа егүүтгэсэн оюутны үхэлд түүний найз охиныг буруутгаснаа Суффолк хотын шүүхээс мэдэгджээ. Одоогоор БНСУ-д амьдарч байгаа 21 настай Инян Ю-д санамсаргүй байдлаар хүн амины гэмт хэрэг үйлдсэн гэж ял оноохоор болсон байна.
Коллежийн оюутан 22 настай Александр Уртула өнгөрсөн тавдугаар сарын 20-ны өдөр төгсөлтийн баяраасаа хэдхэн цагийн өмнө амиа егүүтгэсэн байдалтай олджээ. Тэр нас барахаасаа өмнө найз охин Ю-тэйгээ таарамжгүй харилцаатай байсан байна.
Уртулагийн амиа егүүтгэсэн хэргийг мөрдөн шалгах үеэр цагдаа нар хосын жил хагасын хугацаанд үргэлжилсэн харилцааны явцад хатагтай Ю ноён Уртулад бие махбодь, сэтгэл санаа, үг хэлээрээ байнгын дарамт үзүүлж, хүчирхийлэл үйлддэг байсан гэж үзжээ. Оюутныг амиа егүүтгэхээс хоёр сарын өмнөөс тэдний харилцаа улам бүр хурцдаж, хараал доромжлол, хүчирхийлэл байнга давтагдаж улмаар Ю Уртулад өөрийгөө хороо, үх зэрэг үгсийг олон зуун удаа зурвасаар илгээсэн байна.
"Хэрэв чи амиа хорлочихвол гэр бүл чинь, дэлхий ертөнц бүхэлдээ сайн сайхан болно" гэсэн үгсийг Уртулаг амиа хорлохоос хоёр сарын өмнөөс хэлж байсан нь түүнийг сэтгэл санаа болоод бие махбодио бүрэн хянах боломжгүй болгосон гэж прокурорууд үзжээ.
Инян Ю-ын хэлснээр тэд 75,000 удаа зурвас солилцсон бөгөөд тавдугаар сарын 20-ны өдөр Уртулагийн байршлыг тогтоож очиход гараашид амиа хорлосон байдалтай олдсон юм.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.