ВИДЕО: Дэлхийн тавцанд Монголын хоёр баг хоорондоо учраа таарлаа

Монголын багийн спортын түүхэнд тодоор бичигдэх нэгэн үйл явдал өнгөрөгч амралтын өдрүүдэд тохиолоо. 

Тодруулбал Саудын Араб улсад зохион байгуулагдсан 3х3 сагсанбөмбөгийн энэ оны хамгийн сүүлийн тэмцээн болох Jeddah 2019 тэмцээнд Азийн клубуудын аварга баг болох Тайхар АРА АДМ баг урьдчилсан шатанд гайхалтай ялалтуудыг хийж үндсэн хэсэгтээ нутаг нэгт Улаанбаатар ММС багтайгаа учраа тааран тоглолоо. Тайхар АРА АДМ багийн хувьд урьдчилсан хэсэгт дараах хожлуудыг байгуулсан юм. 

• Саудын Арабын Рияд багийг 21:13 харьцаагаар хожсон

• ОХУ-ын Нева багийг 21:18 харьцаагаар хожсон 

Харин үндсэн хэсэгт Улаанбаатар ММС багтайгаа ширүүн өрсөлдөөнийг үзүүлж 16:14 харьцаагаар хожигдсон ч Монголын шилдэг хоёр баг дэлхийн тавцанд хоорондоо өрсөлдөхийг харах сайхан байлаа. 

Мөн түүнчлэн Улаанбаатар ММС Энержи багийн тоглогч Г.Цэнгүүнбаяр хоёр онооны шидэлтийн тэмцээнд дэлхийн Топ 12 тамирчинтай шидэлтээрээ өрсөлдөж, гуравдугаар байранд орсон байна.