70 кг геройн тээвэрлэж яваад баригдсан дипломатчдыг шүүх хурлын тов гарчээ

ХБНГУ-ын Дрезден дүүрэгт дипломат дугаартай Мерседес Бенц и класс загварын суудлын автомашинд 70 кг хар тамхи тээвэрлэж яваад баривчлагдсан тагнуулын дэд хурандаа Б.Баттүшиг, жолооч С.Эрдэнэбаяр нарыг шүүх хурлын тов гарчээ.

Монголын дипломатчдын шүүх хурал Landgericht Dresden дүүргийн шүүхэд 2019 оны 11 дүгээр сарын 25-аас 12 дугаар сарын 18-ны хооронд болно гэдгийг Дрезден дүүргийн прокурорын газрын хэвлэлийн төлөөлөгч Юрген Шмит www.livetv.mn сайтад ирүүлсэн мэдээлэлдээ дурдсан байв.

Мөн тэрбээр ХБНГУ-ын Эрүүгийн хуульд заасны дагуу дээрх гэмт этгээдүүдэд 15 хүртэл жилийн хорих ял оноож магадгүй хэмээн бидний асуултад хариуллаа. Дрезден дүүргийн прокурорын газраас Б.Баттүшиг, С.Эрдэнэбаяр нарт яллах дүгнэлт үйлдэн 2019 оны наймдугаар сарын 12-ны өдөр шүүхэд шилжүүлсэн талаар бид өмнө нь мэдээлсэн билээ.

Их хэмжээний хар тамхи тээвэрлэж яваад баривчлагдсан дипломат ажилтнуудаа ялтан шилжүүлэх шугамаар татан авах хүсэлтээ Монголын Засгийн газраас ирүүлээгүй гэдгийг Юрген Шмит хэллээ.