Шахмал түлшний талаар өдөр бүр 10:00, 16:00 цагуудад мэдээлэл өгнө

Угаарын хийнд иргэд хордож буй асуудалтай холбоотойгоор сайжруулсан шахмал түлштэй холбоотой цаг үеийн мэдээллийг өдөр бүр 10:00, 16:00 цагуудад холбогдох байгууллагуудаас тогтмол хүргэж байхаар болжээ.  

Өчигдөр буюу аравдугаар сарын 09-ний 16:00 цагт өгсөн мэдээллээр нийт 60 өрхийн 135 хүн угаарын хийн хордлогын улмаас эмнэлгийн тусламж, үйлчилгээ авсан байна. Үүний 80 нь насанд хүрэгчид, 55 нь хүүхэд байна. Нийслэлийн түргэн тусламж 54 өрхийн 122 хүнд тусламж үйлчилгээ үзүүлж ажиллажээ.

Мөн Эх хүүхдийн эрүүл мэндийн үндэсний төвд 38 хүүхэд эмчилгээнд хамрагдсан бөгөөд 17 хүүхдэд гэрээр зөвлөгөө өгсөн байна. Одоо гурван хүүхэд хэвтэн эмчлүүлж байна. Насанд хүрэгчдийн 60 хувь нь хордлогын төвд эмчилгээнд хамрагдаж, 20 хүнд гэрээр зөвлөгөө өгсөн. Хордлогын төвд одоо долоон хүн хэвтэн эмчлүүлж байгаа юм байна.

Түүнчлэн үүссэн нөхцөл байдалтай холбоотойгоор нийслэлийн болон дүүрэг, хороодын төрийн албан хаагчид 24 цагийн өндөржүүлсэн бэлэн байдалд шилжин, иргэдэд сайжруулсан шахмал түлшний галлагааны талаарх зөвлөгөө мэдээллийг гэрт нь хүргэж ажиллаж байгаа юм.