Хонконгийн удирдагч Кэрри Лам нүүрний багийг хориглолоо
Хонконгийн удирдагч Кэрри Лам олон сар үргэлжилсэн иргэдийн жагсаал тэмцлийн дараа эрх мэдлийнхээ хүрээнд колонийн үеийн онц байдлын хуулиар нүүрний багийг хориглох шийдвэр гаргалаа. Энэ сарын 1-ний мягмар гарагт БНХАУ тунхагласны 70 жилийн ойгоор Хонконгийн жагсагчид эсэргүүцлийн жагсаал тэмцэл зохион байгуулж, үймээн самуун газар авснаас шалтгаалж гүйцэтгэх засаглалын тэргүүн өнөөдөр мэдэгдэл хийжээ.
Жагсагчид 17 долоо хоног жагсаалаа үргэлжлүүлэхдээ хорт хийн баг, хар баг зэргийг ашигласан ба энэ амралтын өдрүүдэд ч жагсаал өргөн хүрээг хамарч магадгүй юм.
Кэрри Лам мэдэгдэхдээ “эмх замбараагүй байдал, мөргөлдөөн хотыг сүйтгэж байна. Эрх баригчид нөхцөл байдлыг улам дордуулж зөнд нь орхих боломжгүй” гэжээ. Хориг маргааш буюу бямба гарагт хэрэгжиж эхэлнэ. 1922 онд санаачилж байсан Онц байдлын үед ашиглах тогтоолыг 1967 оны Хонконгийн жагсаал мөргөлдөөнөөс хойш ашиглаагүй юм.
Энэ долоо хоногт болсон жагсагчид болон цагдаа нарын мөргөлдөөний үеэр нэг хүн галт зэвсэгт шархдаж, сэтгүүлчийн нүдийг сохолсон хэргүүд ар араасаа гарсан. Дашрамд мэдээлэхэд Хонконгийн жагсагчид 2006 онд дэлгэцнээ гарч байсан "V for Vendetta" уран сайхны киноны гол дүр V-ийн багийг ашиглан өөрсдийн үзэл бодол, байр сууриа илэрхийлэн бэлгэ тэмдгээ болгосон юм.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.