”Хүний заяа”-г хүмүүс яаж хүлээж авах бол?

Ардын Жүжигчин, Төрийн Шагналт Ц.Намсрайжавын нэрэмжит Улсын Филармонийн удирдлага, уран бүтээлч хамт олны шинэ улирлын нээлтийн тоглолт энэ амралтын өдрүүдэд Улсын Филармонийн концертийн танхимд болох нь. Энэ жилийн тоглолт морин хуурын чуулга болоод гоцлол дуучидтай хамтарч байгаагаараа онцлог юм. 

“Newseason-2019” тоглолтын тасалбар дуусч, үзэгчдийн дунд эрэлт ихтэй байгаа тул энэ сарын 18-нд 19.00 цагт дахин тоглохоор болжээ. Уянгалаг аялгуу, гайхамшигтай мэдрэмж төрүүлэх уг тоглолтын бас нэгэн шигтгээ нь гоцлол дуучин С.Баттулгын толилуулах дэлхийн алдартай “Westlife” хамтлагийн дуулсаг "You raise me up", мөн монголын үе үеийн дуучдын мэргэжил, ур чадварыг шалгасан С.Жамбалдоржийн үг, Н.Жанцанноровын аялгуу "Хүний Заяа" дууг улсын Филармонийн гоцлол дуучин Н.Наранбаатар дуулна. Ихэнхдээ сонгодог, тавилттай хоолойгоор дуулагдаж ирсэн энэ бүтээлийг жазз дуучин залуу морин хуурын чуулгатай өөрийн өнгө аясаар дуулж сонсогчдын хүртээл болгох юм.