Афганистанд Ерөнхийлөгчийн сонгуульд 18 нэр дэвшигч өрсөлдөж байна

Афганистаны ард иргэд өнөөдөр шинэ Ерөнхийлөгчөө сонгох санал хураалтад оролцож байна. Гэвч зарим бүсэд санал хураах иргэдийн аюулгүй байдал зөрчигдөж болзошгүй байгааг олон улсын эх сурвалжууд онцолжээ.

Талибаны зэвсэгт бүлэг санал хураах байрууд руу дайрч, сонгуулийн явцыг бусниулна гэдгээ анхааруулж байгаа юм. Одоо шинээр сонгогдох Ерөнхийлөгч авлига хээл хахууль, зэвсэгт мөргөлдөөний эсрэг дөрвөн жил тэмцэж эрх барина.

Афганистанд АНУ тэргүүтэй гадны орнууд цэрэг дайчдаа оруулснаас хойш 20 орчим жилийн турш Талибаны зэвсэгт бүлэгтэй тэмцэлдсэн ч жил бүр олон мянган хүний амь нас эрсэдсээр байгаа юм. Тус улсад Америкийн 14,000 цэрэг, Их Британи, Итали, Германы олон мянган цэрэг армийн бие бүрэлдэхүүн байрлаж байна.

Энэ удаа сонгогдох Ерөнхийлөгч АНУ Талибаны эсрэг тэмцэж цэрэг дайчдаа илгээнээс хойш дөрөв дэх сонгуулиар төрийн эрх барина. Таван жилийн өмнө болсон Ерөнхийлөгчийн сонгууль эмх замбараагүй байдал, саналын хуудсыг будлиантуулсан хэргээр ихээхэн шүүмжлэл дагуулсан юм. Өнөөдрийн санал хураалт өмнөхөөсөө дээрдэнэ гэсэн найдвар тун бага гэж ВВС агентлаг мэдээлжээ.

Тус улсын 37 сая хүн амын 10 сая орчим нь саналаа өгөхөөр бүртгүүлсэн байна. Газрын эзэд, тагнуулын ажилтнууд, коммунист Засгийн газрын гишүүд асан зэрэг 18 хүн нэр дэвшжээ. Гол өрсөлдөгчид одоогийн Ерөнхийлөгч Ашраф Гани болон 2014 оны сонгуулиас хойш гүйцэтгэх засаглалын тэргүүнээр сонгогдсон Абдулла Абдулла нар юм.

Нэр дэвшигчдийн аль нэг нь 50-иас илүү хувийн санал авахгүй бол Ерөнхийлөгчийн хоёр дахь шатны санал хураалт  явагдана. Гурван долоо хоногийн дараа санал хураалтын дүн гарах ба хэрэв хоёрдугаар шатны санал хураалт явагдах бол ирэх 11 дүгээр сард болно. Өнөөдөр нийт 5,000 санал хураах байр ажиллана.

Эх сурвалж: www.bbc.com