Монголчууд “дэлхийн шилдгээс” хоцрохгүй

Нийслэлийн Засаг Даргын Тамгын Газар, Нийслэлийн Соёл Урлагийн Газар, Монголын Урлагийн Зөвлөл /Arts Council of Mongolia/ хамтран кино урлагийн салбарын олон улсын хамтын ажиллагааг нэмэгдүүлэх, Монголын кино урлагийн салбарыг хөгжүүлэх, дэлхийн нэр хүндтэй наадмуудад шалгарсан кино бүтээлийг монголын үзэгчдэд хүргэх зорилготой 10 дахь удаагийн “Улаанбаатар” олон улсын кино наадам энэ сарын 22-28-нд Улаанбаатар хотод зохион байгуулна.

Энэ оны наадмын хөтөлбөр нь:  

Монгол киноны уралдаант хэсэг

Олон улсын уралдаант бус хэсэг

Онцлох орны кино хөтөлбөр

Кино форум

Кино салбарын сургалт гэсэн таван хэсгээс бүрдэх юм.

Энэ удаагийн наадмын хүрээнд нээлтийн монгол кино бүтээлийн уралдаан, Монгол кино бүтээлийн уралдааныг хоёр дахь удаагаа зарлаж байгаа бөгөөд уралдаанд огт нээлтээ хийгээгүй, шинэ, бүрэн хэмжээний Монголын уран сайхны кино, өнгөрсөн жилийн 10-р сарын 1-ний өдрөөс хойш нээлтээ хийсэн уран сайхны кино, бүрэн хэмжээний хүүхэлдэйн кино, богино хэмжээний кино гэсэн гурван төрөлд кино бүтээл хүлээж авч байгаа гэнэ.

Наадмын нээлтийн киногоор шалгарсан бүтээл нь тус наадмын хүрээнд дэлхийн нээлтээ хийх болоод олон улсын кино наадам зохион байгуулагч, найруулагч, продюсер нарт танилцуулагдаж, олонд толилуулах бүрэн эрхээр хангагдах аж.

Монгол кино уралдаанд ирүүлсэн кино бүтээлүүдээс “Монгол кино хөтөлбөр”-т оролцох зургаан бүтээл шалгаруулна. Шалгарсан бүтээлүүдийг олон улсын кино найруулагч, продюсер, олон улсын кино наадмын зохион байгуулагч болон олон нийтэд толилуулах аж.