96 дахь жилдээ үс засч буй Манчинелли..

Бараг бүхэл зууны турш нэг ажлаа өдөр бүр давтаж хийнэ гэдэг амаргүй. Гэтэл 96 жилийн турш өдөр бүр үс зассан 107 настай эрхэм Энтони Манчинелли үйлчлүүлэгчдээ угтаж авсаар өдрийг өнгөрөөнө.

1911 онд Италийн Нэплед төрж, найман настайдаа гэр бүлийнхэнтэйгээ Америкт цагаачилж иржээ. 11 настай бяцхан Манчинелли үсчний газарт туслахаар орж, 12 настайгаасаа үс засч эхэлсэн байна. Эхээс наймуулаа ч одоо ганцаараа үлджээ. Түүнийг анх ажиллаж байхад 25 центээр үс засдаг байсан бол одоо 19 доллар болсон байна.

Ноён Манчинелли Нью-Йоркийн үсчний газарт долоо хоногийн таван өдөр үд дундаас үдшийн 20 цаг болтол ажлаа хийнэ. Залуу үсчид хөл нь өвдөж, чилсэн гэж амрах боловч 107 настай ажилчин ядрах, өвдөхийг үл мэдэн ажлаа хийсээр. 2007 онд түүнийг 96 настай байхад дэлхийн дээд амжилт бүртгэдэг Гиннесийн номонд хамгийн урт насалж ажлаа хийсээр буй үсчингээр нэрлэж байжээ. Үүнээс хойш Манчинелли жил бүр амжилтаа ахиулсаар, төрсөн өдөр болгоноо ажлынхантайгаа тэмдэглэн өнгөрүүлдэг байна.

Ажлаасаа холгүй ганцаараа амьдардаг. Хайртай эхнэр нь өөд болоод 14 жил өнгөрчээ. Гэвч өглөө бүр ажилдаа ирэхдээ эхнэрийнхээ шарил дээр очдог уламжлалтай гэнэ. 

Түүний хүү Боб Манчинчеллийн ярьснаар үйлчлүүлэгчид нь хэдэн үеэрээ ирэх нь бий гэжээ. Ихэвчлэн 50 орчим насныхан Манчинеллийг зорин ирдэг ба үйлчлүүлэгчийнх нь аав, аавынх нь аавын үсийг засч байсан нь гайхалтай. Зарим алдартнууд, аялагч жуулчид, сонин содон зүйл сонирхогчид дэлхийн хамгийн урт настай үсчнээр үйлчлүүлэхээр ирдэг байна. Ирсэн зочид бүгд түүнийг чадварлаг, эрүүл чийрэг байгааг гайхаад буцдаг тухай үсчний газрын эзэн ярьжээ. Ам дүүрэн шүд, толгойтой үс нь халцарч дуусаагүйд олон хүн гайхдаг.

Эх сурвалж: www.nytimes.com