141 сургууль номын санчгүй нээлттэй номын сантай боллоо
Номын сангийн ажилтангүй нээлттэй номын санг Баянгол дүүргийн ерөнхий боловсролын 141 сургуулийн эцэг, эхийн оролцоотойгоор өнөөдөр байгууллаа.
Тус сургууль өнгөрсөн жил ашиглалтад орсон бөгөөд сургалтын орчин дутагдалтай байсан тул эцэг, эхчүүд төрийн болон сургуулийн захиргаатай хамтран номын сантай болох ажлыг эхлүүлэн өнөөдөр 2500 гаруй номтой нээлттэй номын санг байгуулж чаджээ.
Нээлттэй номын сан гэдэг нь тухайн сурагч өөрийн хүссэн номоо сонгон уншаад буцаагаад номын тавиуртаа тавих юм. 141 дүгээр сургуулийн сул орон зайг ашиглан номын тавиур байрлуулан номуудаа өрсөн байв.
Тус сургуулийн “Эцэг, эхийн зөвлөл” ТББ-ын тэргүүн Ц.Түмэнбаяр “Номын сан байгуулах санхүүжилтийн 80 хувийг сургуулийн 1000 гаруй эцэг, эхийн хандив тусламжаар босгосон. Номын фондоо бүрдүүлэхийн тулд “Нэг номын хүч” аянг зарлан 2500 гаруй номыг одоогийн байдлаар цуглуулаад байна. Сурагч хүүхдүүд маань өөрсдөө уг номын сандаа эзэн болж, хяналт тавих бөгөөд авсан зүйлсээ буцаагаад тавих төлөвшилд суралцана гэдэгт итгэлтэй байна” гэсэн юм.
Тус сургуулийн сурагч нарын хувьд ийм номын сантай болж буйдаа баяртай байна гэсэн бөгөөд Монголын түүх, шинжлэх ухаан, ухаарал, сургамж хайрласан номыг хамгийн түрүүнд олж уншина хэмээн сэтгэгдлээсээ хуваалцсан юм.
Уг номын сангийн нээлтийн үйл ажиллагаанд Баянгол дүүргийн Засаг дарга С.Одонтуяа оролцсон бөгөөд бусад сургууль, албан байгууллагууд нэгдэн ийм нээлттэй номын сантай болохыг уриаллаа.
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.