Энэтхэгчүүд болзоондоо!

Технологийн дэвшил аль ч салбарт хөгжсөнөөр хүн төрөлхтөн хоорондын харилцааг илүү хялбарчилж байна. Хүн амаараа дэлхийд хоёрдугаарт ордог Энэтхэг улсад Америкийн “Tinder” танилцаж, болзох апп ноёлж байна. Тэгвэл үүнтэй ижил “Bumble” апп Энэтхэгийн зах зээлд хүч түрэн орж ирлээ. “Bumble” болзооны программ Tinder, TrulyMadly, Woo зэрэг ижил төрлийн программуудтай өрсөлдөж эхэлсэн байна.

Гэвч болзоонд зориулсан апп-ууд тэрбум гаруй хүн амтай зах зээлд тэргүүлэхэд багагүй саад бэрхшээлтэй учирна. Яг үнэндээ Энэтхэгчүүд ийм төрлийн программуудыг өрнөдийнхний жишгээр ашиглах нь амаргүй. Төв суурин газарт амьдардаг, англи хэлтэй иргэд чөлөөтэй ашигладаг ч орон нутгийн иргэд төдийлөн анхаараад байдаггүй.

Тус улсад 18-21 настай залуус болзох гэж биш, найзалж нөхөрлөх хүнээ хайж болзооны аппликейшн ашигладаг гэнэ. Харин 26-аас дээш насныхан хамт амьдрах хүнээ хайдаг. Гэвч бие даасан охид апп-д бүртгүүлсэн байгаагаа гэрийнхэн, төрөл садангаасаа нуухыг хүсдэг гэжээ.

Хүн ам ихтэйн дээр ядууралтай тэмцэж байгаа Энэтхэгт эмэгтэйчүүдийн аюулгүй байдлыг хамгаалах чухал асуудал байдаг. TrulyMadly болзооны аппликейшныг жишээ татвал итгэлцлийн оноотой. Өөрийн фэйсбүүк хуудсаараа баталгаажуулдаг байна. Жинхэнэ хаяг мөн эсэхийг, ойрын хүрээлэл, хуудсаа хөтөлсөн хугацааг шалгаж бүртгэдэг гэнэ. Гэрлэсэн эрчүүд, эмэгтэйчүүд маш цөөн тохиолдолд ханддаг ч ийм хүмүүст болзооны апп ашиглах зөвшөөрөл олгодоггүй байна.

Эх сурвалж: www.qz.com