“Сауд гоби коэл транс” ХХК-ийн ард байгаа олигархи нь сахал Д.Эрдэнэбилэг үү

Монгол Улсын Ерөнхий сайд У.Хүрэлсүх хоёр өдрийн өмнө цочир мэдэгдэл хийсэн. Тэрбээр “Сүүлийн үед уул уурхайн салбарт ажиллаж буй ЗАРИМ НЭГ ХҮН, ЗАРИМ НЭГ ОЛИГАРХИУД Монгол төрийн хуулийг ихээхэн зөрчиж байна. Уул ус хилэгнүүлж, ард түмнийг уйлуулж байна. Гурвантэс сумын иргэд газар нутгаа хамгаалж, уйлаад ярьж байна. Тэд төрөөс юу ч гуйгаагүй, газар нутгийнхаа бүрэн бүтэн байдлыг хамгаалж үлдэхийг гуйж байна. Тост, Тосон бумбын нуруунд үйл ажиллагаа явуулж байгаа “Сауд гоби коэл транс”-ХХК-ийн тусгай зөвшөөрлийг өнөөдөр цуцал. Цуцлаж чадахгүй бол та нар өөрсдөө ажлаа өгөөрэй” хэмээн хэлсэн.

Ерөнхий сайдын лүндэн буусан даруйд Байгаль орчин, аялал жуулчлалын сайдын 01/5640 тоот дүгнэлт гарсан. Мөн Уул уурхай, хүнд үйлдвэрийн сайд Д.Сумъяабазарын 01/2291 дугаартай албан бичгийн дагуу Ашигт малтмал, газрын тосны газар кадастрын хэлтсийн даргын 405 дугаартай шийдвэрээр “Сауд гоби коэл транс” ХХК-ийн тусгай зөвшөөрлийг тэр өдөрт нь цуцалж байв.

Харин өнөөдөр ЦЕГ-ын дарга С.Баатаржав тус уурхайд очиж, эрх бүхий байгууллагын шийдвэр тушаалыг үзүүлж, үйл ажиллагааг нь бүрэн зогсоосон гэдгээ мэдэгдлээ.

Ерөнхий сайдын цочир мэдэгдэлд дурдагдсан “ЗАРИМ НЭГ ХҮН, ЗАРИМ НЭГ ОЛИГАРХИ” гэдэг нь явж явж Худалдаа хөгжлийн банк болон Улаанбаатар хотын банкны эзэн “сахал” хочит Д.Эрдэнэбилэг болж таарав бололтой.

“Сауд гоби коэл транс” ХХК-ийн эзэмшигч хэн болохыг Улсын бүртгэл мэдээллийн нэгдсэн сангаас шүүж үзэхэд “Чанцалын Орхон, Төгсжаргалын Мөнхбат” гэдэг хоёр хүний нэр дээр бүртгэлтэй байгааг та харж байна.

Чанцалын Орхон гэдэг энэ нэр өнгөрсөн өвлөөс эхлэн Монголчуудын сонорт хүрч эхэлсэн боловч гэгээн дүрийг нь хэн ч харж байгаагүй. Гэхдээ энэ хүн Монголын Улсын төв талбай буюу “Сүхбаатарын талбай”-н урд талын 2.5 га газрыг өөрийн 100 хувь эзэмшдэг “Ю Би Констракшн” ХХК-ийн нэр дээр 2006 оноос хойш эзэмшиж эхэлжээ.

Түүгээр ч зогсохгүй тус газраа барьцаалан Сахал Д.Эрдэнэбилэгийн 99.99 хувийг нь эзэмшдэг гэх Улаанбаатар хотын банкинд барьцаалж, өнөөдрийн ханшаар бодоход 22.5 тэрбум төгрөгийн зээл авсан болохыг хэвлэл мэдээллийн хэрэгслүүд шуугин бичиж байсан юм.

Мөн Чанцалын Орхон нь “Сахал” Д.Эрдэнэбилэгийн тоглоомын компаниудын нэг гэгддэг “Монголиан рэйлвэй корпорэйшн” ХХК-ийг 100 хувь эзэмшдэг юм байна.

Эрдэнэт үйлдвэрийн 49 хувийг луйврын аргаар худалдан авсан хэмээн буруутгагдан шалгагдаж байгаа Ц.Пүрэвтүвшин нь 2014 оны 10 дугаар сарын 03-ны өдөр 17 компанийн захирлаар нэгэн зэрэг томилогдож байсан. Харин тэрхүү 17 компанийн нэг нь “Монголиан рэйлвэй корпорэйшн” ХХК байсан юм. Энэ бүхнээс харвал Чанцалын Орхон гэх энэ хүний эзэмшиж компаниудын явуулж буй үйл ажиллагаанууд нь бүгд “Сахал” хочит Д.Эрдэнэбилэгтэй холбогдоод байгаа нь санамсаргүй зүйл биш биз ээ.