Сар бүрийн эхний ням гаригийг машингүй өдөр болгоно
Агаарын бохирдлыг бууруулж, олон нийтийн амарч зугаалах газруудыг хөгжүүлэхээр Франц улсын нийслэл Парис хотын эрх баригчид сар бүрийн эхний ням гаригийг машингүй өдөр болгохоор шийджээ. Хотын дарга Анне Хидалгогийн удирдсан санаачилга ирэх аравдугаар сарын 7-ны өдрөөс хэрэгжиж эхэлнэ.
Парисын зарим газарт энэ санаачилгыг туршиж эхэлжээ. Цаашид хотын нэгдүгээр дүүргээс эхлээд дөрөвдүгээр дүүрэг хүртэл төв хэсгээр машингүй өдрийн дүрмийг тогтмол хэрэгжүүлнэ гэжээ.
Энэ өдөр оршин суугчид 10-18 цаг хүртэл явган ба дугуй, скүтерээр хотын төвд зорчих эрхтэй. Олон нийтийн болон орон нутгийн тээврийн хэрэгсэл, таксинууд, шашны арга хэмжээнд явж байгаа автомашинууд хотын төвд нэвтэрч болох ч 20 км/цагаас илүү хурдалж болохгүй.
Хотын дарга Анне Хидалго өнгөрсөн гуравдугаар сард нийтийн тээврийн хэрэгслийг нэмэгдүүлж хотын агаарын бохирдлыг бууруулах санал дэвшүүлж байсан удаатай. Тэрээр дэлхийн томоохон хотууд агаарын бохирдолгүй тээврийн хэрэгслийг ашиглахаар зорих болсныг онцолж байжээ.
Эх сурвалж: www.independent.co.uk
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.