У.Хүрэлсүхийн Засгийн газрыг огцруулъя, чадахгүй бол УИХ тарах ёстой

Зам тээвэр хөгжлийн сайдыг чөлөөлөх асуудлыг хэлэлцэх үеэр УИХ дахь АН-ын бүлгийн дарга Д.Эрдэнэбат “Хариуцлага хүлээх, 60 тэрбумаар авилгыг гааруулж, төрийн албыг улстөржүүлэн арилжаалж, шударга бус үйлдэл гаргаж Монгол улсын үндсэн хууль болон бусад хуулиудыг удаа дараа ноцтой зөрчсөн У.Хүрэлсүхийн Засгийн газрыг огцруулах нь төрийн эрх барих дээд байгууллага УИХ-ын үүрэг мөн. Засгийн газрын бодлогогүй байдал анархизмд хүргэж байна. Хэрэв Засгийн газартаа хариуцлага тооцож чадахгүй бол УИХ өөрөө тарах ёстой гэдгийг хариуцлагатайгаар мэдэгдье” хэмээн мэдэгдлээ.

Тэрээр

-Монголын төрд хариуцлагын систем алга. Зам, тээвэр хөгжлийн сайд Ж.Бат-Эрдэнэ огцорсон болж харагдсанаар энэ салбарт асуудал намжихгүй нь ойлгомжтой. Мөн Монгол улс нутаг дэвсгэр дээрээ тусгай ажиллагаа явуулж Турк улсын иргэнийг хулгайлахыг оролдсон нь манай улсын тусгаар тогтнол үндэсний аюулгүй байдалд маш ноцтой заналхийлсэн үйл явдал юм. Мөн Монгол улсын эдийн засгийн гол ачааг үүрдэг Эрдэнэт үйлдвэрийг зээлийн барьцаанд тавьсан асуудалд нэг мөр хариу өгдөг, шийдвэр гаргадаг төр алга. Эдгээр асуудлуудаар Ерөнхий сайдад асуулга хүргүүлсэн. Ойрын хугацаанд хариу өгөх байх гэж найдаж байна. Мөн улс орондоо хэрэгтэй зүйл хийхийг шаардаж байна хэмээн үг төгсгөлөө.