Бразилийн Ерөнхийлөгч хүүгээ АНУ-д суух элчин сайдаар томилжээ
Бразилийн шинээр сонгогдсон 38 дахь Ерөнхийлөгч Жаир Болсонару АНУ-д суух онц бөгөөд бүрэн эрхт элчин сайдаар өөрийн төрсөн хүүг томилсон нь дэлхийн хэвлэл мэдээллийн салбарынхны анхаарлыг татжээ. Энэ жил 35 настай Эдуардо Болсонару Конгрессын гишүүний алба хааж байгаа бөгөөд энэ оны нэгдүгээр сард аавыгаа Ерөнхийлөгчийн тангараг өргөснөөс хойш гадаад хэргийн зөвлөхөөр нь ажиллах болсон байна.
Тус улсаас Америкт суух элчин сайдын орон тоо өнгөрсөн дөрөвдүгээр сараас хойш гурван сарын турш эзгүй байгаа юм. Болсонаругийн хүү элчин сайдаар томилогдвол Конгрессын гишүүний суудлаасаа татгалзах ёстой. Бразилийн Ерөнхийлөгчийг сонгогдоход Америкийн Ерөнхийлөгч Дональд Трампын дэмжлэг ихээхэн тус болсон гэж эх сурвалж дурджээ. Түүнчлэн Эдуардо Болсонаро Бразилийн Гадаад хэргийн яаманд маш чухал нөлөө бүхий эрхэм гэжээ.
Жаир болон Эдуардо эцэг хүү Болсонару АНУ-ын бодлогыг дэмжигчид гэдгээ харуулсан байна. Бразилийн өмнөх эрх баригчид Арабын орнуудтай болгоомжтой харьцдаг байсан бол шинэ эрх мэдэлтнүүд тогтсон уламжлалыг эвдэж Эдуардо нь Израйлийн байр суурийг онцгойлон дэмжиж буйгаа ил тодоор илэрхийлдэг.
Бразилийн Ерөнхийлөгчийн том хүү Флавио Сенатын гишүүн бол дунд хүү Карлос нь Рио де Жанейро хотын зөвлөлийн гишүүн ажээ.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.