Циркийн барнууд сургагч руугаа дайрч амийг нь хороожээ

Италийн Триггианод аялан тоглолтоор ирсэн байсан Орфей циркийн ажилтан сургаж байсан барнууддаа бариулж амиа алдсан байна. 61 настай Этторэ Вебер сургуулилалтын үеэр дөрвөн бартай ажиллаж байжээ. Тэдний нэг нь гэнэт дайрч үлдсэн гурав нь араас нь дайрсан байна. Орон нутгийн мэдээллийн хэрэгслийн дамжуулснаар циркийн өөр нэг ажилтан хэргийг мэдэх хүртэл барнууд сургагчийн цогцсоор тоглож байсан гэжээ. Этторэ Вебер нь Орфей циркид олон жил ажилласан туршлагатай ба олны дунд нэр хүндтэй сургагчдын нэг ажээ. 

Сургагч руу дайрсан барнуудыг циркээс авч яван сафарийн цэцэрлэгт хүрээлэн рүү нүүлгэсэн байна. Цагдаагийн ажилтнууд хэргийг мөрдөн шалгаж эхэлжээ. Орфей циркийн хамт олон өнгөрсөн зургадугаар сарын 15-ны өдөр Триггианод аялан тоглохоор ирсэн ба энэ сарын 14-ний өдөр буцах ёстой байжээ. Дэлхийн 40 орчим улсад циркийн үзүүлбэрт зэрлэг ан амьтад ашиглахыг хориглосон байдаг ба тэдгээрийн тэн хагас нь Европын орнууд юм.

Эх сурвалж: www.bbc.com