Холимог тулааны дэлхийн шилдэг холбоо болох UFC-д Монгол тулаанч хоёр дахь тулаанаа хийх гэж байна. Тэр бол Д.Батгэрэл.
Мэргэжлийн тавцанд есөн тулаан хийж долоо ялж, хоёр ялагдаад буй монголын шилдэг тулаанч Д.Батгэрэлийн хувьд өнгөрсөн оны наймдугаар сард UFC-д анхны тулаанаа Өвөрмонгол залуу Алтанхилтэй тулалдан ялагдсан хэдий ч тухайн үдшийн хамгийн шилдэг тулаанаар нэрлэгдэж байлаа.
UFC холбоо, “Team Tungaa” “One team” клубийн тамирчин Д.Батгэрэлтэй өрсөлдөх Аргентин тулаанч Гуидо Каннетти мэргэжлийн рингэнд 12 тулаан хийж найм ялж, дөрөв ялагдсан байна. Хамгийн сүүлд 2018 онд Экуадорын тулаанчид ялагдаад байгаа тэрээр UFC-д таван тулаан хийгээд амжсан. Д.Батгэрэлийн хувьд энэ жил 30 настай бол түүний өрсөлдөгч Гуидо Каннетти 40 настай.
Маргааш буюу гуравдугаар сарын 8-ны өдөр Улаанбаатарын цагаар 07:00 цагт тэдний тулаан явагдана. Энэ өдрийн оргил тулаанаар нэг ч ялагдаагүй яваа аварга Исраел Адесаня болон чөлөөт бөхийн дэлхийн аварга, олимпийн мөнгөн медальт Ёол Ромеро нар тулалдана.