Чернобыльд авахуулсан нүцгэн зураг Инстаграмд шүүмжлэлд өртөв

HBO кино компанийн "Черонобыль" таван цуврал баримтат уран сайхны кино цацагдаж, дуулиан тарьснаас хойш хордож орхигдсон Украйний Припять хот орос хэлт загвар өмсөгч, блогч, инстаграмчдын хорхойг хүргэх болжээ. Үүний нэг илрэл болж, инстаграм дээр nz.nik нэртэй загвар өмсөгч тус хотод очиж, нүцгэн зургаа даруулсан нь инстаграмчдын ярианы нэг сэдэв болоод байна. 

Хамгаалах хувцас өмсөөгүй, дотуур өмдтэйгээ авахуулсан энэхүү зураг одоогоор хэл нэгтнүүдээсээ давхардсан тоогоор 20 000 лайк авч, төдий тооны сэтгэгдэл цуглуулаад байгаа аж. Сэтгэгдэл бичигдчийн зарим нь бүсгүйн эрүүл мэндэд санаа зовнисон бол нөгөө нэг хэсэг нь сайшааж, харин осол болж, олон зуун хүн нас барсан газарт хүндэтгэлгүй харьцлаа хэмээн буруутгах хүн нэлээдгүй байжээ. 

"Чернобыль" цувралын найруулагч Грэйг Мазины анхаарлыг энэхүү инста зураг татсан ба "Бидний бүтээл дэлхийн хүмүүст ингэж нөлөөлж байгааг харахад таатай байгаа ч хүмүүс нэн тэргүүнд осол болсон газарт амь үрэгдсэн хүмүүст хүндэтгэлтэй хандах хэрэгтэй" гэжээ. 

Эргэн сануулахад, 1986 оны дөрөвдүгээр сарын 26-нд Чернобылийн атомын цахилгаан станцад Беларус, Украйн, ЗСБНХОУ (хуучнаар)-ын 8.4 сая хүн амын амь насанд заналхийлсэн, дэлхийн түүхэнд томоохонд тооцогдох осол гарч, Припять болон Чернобыль хотын оршин суугчдыг нүүн шилжүүлсэн юм.