Л.Нинжжамц: “Пабло Эскабор” гарна, МҮОНТВ-ийн нийтлэлийн бодлогод халдах эрх хэнд ч байхгүй

 Өнөөдөр ЦЕГ-ын Хар тамхитай тэмцэх газраас хар тамхины хэрэглээг харуулсан ямар ч нийтлэл, нэвтрүүлэг, киног гаргахгүй гэдгээ мэдэгдсэн. Энэ дагуу МҮОНТВ-ээр цацагдаж байгаа хар тамхины мафийн бүлэглэлийн толгойлогч Пабло Эскаборын бодит түүхээс сэдэвлэн хийсэн олон ангит кино үргэлжлэн гарах эсэхийг МҮОНТВ-ийн Ерөнхий захирал Л.Нинжжамцаас тодрууллаа.

МҮОНТВ-ийн Ерөнхий захирал Л.Нинжжамц

“Пабло Эскабор” ОАК-г угаасаа дуустал нь гаргана. Манай нийтлэл, нэвтрүүлгийг гаднаас зогсоох боломж хуулиараа байхгүй шүү дээ. Олон нийтийн телевизийн нэвтрүүлгийн бодлогод гаднаас хөндлөнгөөс оролцох эрх хэнд ч байдаггүй. Нэвтрүүлгийн бодлогын үндсэн эрхийг Ерөнхий захирал зангидаж байдаг. Хараат бус байх ёстой нийтлэлийн бодлогыг танай сайт хараат мэтээр биччихсэн байна. Олон нийтийн телевизийн хуулийг хараарай. Манай телевизийн нийтлэлийн бодлогод Үндэсний зөвлөл нь ч халдах эрх байдаггүй.

ЦЕГ-ын Хар тамхитай тэмцэх газрын дарга Ж.Эрдэнэболд

2019 оны тавдугаар сараас хар тамхи, мансууруулах бодисын хэрэглээг өөгшүүлэн сурталчилсан асуудалд төрийн хяналт тавигдаж эхэлсэн. Хар тамхины хэрэглээг харуулсан мэдээ мэдээлэл, кино гарахгүй байгааг та бүхэн мэдэж байгаа. Манай видео сангууд хар тамхины хэрэглээг харуулсан киног өөрсдөө хаасан байна билээ. Энэ үнэхээр сайн. Манай кино театрууд ийм киног гаргахгүй гэж хэлээд зөвшөөрөлгүй буцаалаа гэх зэргээр  үнэхээр сайхан дэмжиж ажиллаж байгаа. Манай сайтуудын нэгдсэн холбооноос сайтууддаа арга зүйн зөвлөгөө өгч ажиллаж байгаа юм билээ.

Зарим нэг улсуудаас гомдол мэдээлэл гарсан. Дэлхий нийтийн хүртээл болсон Холливүүдийн киног та нар хаагаад байхдаа яадаг юм гэдэг асуудлыг тавьсан. Бид бүхэн Монгол Улсад тохирсон ажил арга хэмжээг хууль тогтоомжийн дагуу хэрэгжүүлж ажиллаж байгаа. Нийтийн эрх ашиг байна уу гэхээс нэг хүний эрх ашиг, нэг хэсэг хүний эрх ашиг гэж байхгүй. Энэ дээр Монголын төр хатуу байр суурь барьж ажиллана.