Турк зураачийн 50 уран бүтээлийг үзэж, түүнтэй хамт аялаарай

Түүний уран бүтээлийг ойроос бус алсаас харах болгонд нэг өөр дүрслэл, мэдрэмжийг мэдрүүлэх болно. Туркийн зураач Акын Экижигийн бүтээлүүдээс юу олж үзэх вэ хэмээн та гайхан асууж магадгүй. Босфорын эрэг, далай тэнгис, ногоон толгод, Туркийн байгаль, хүн ардыг үзэх үү. Энэ бүгдийн аль нь биш. Гэхдээ түүний бүтээлээс дээрх бүгдийг олж харж болохоор.

Тэрбээр өөрийн түүхээ будгийн хусуур ашиглан тод хурц, бүдэг өнгөөр дүрслэн харуулдаг бөгөөд өнөөдөр “Амьдрал хэмээх аяллын түүхээс” үзэсгэлэнгээ Монголын Уран зургийн галерейд нээлээ.

Бүгд Найрамдах Турк Улс болон Монгол Улсын хооронд дипломат харилцаа тогтоосны 50 жилийн ойн хүрээнд Туркийн Гадаад харилцааны яам, Бүгд Найрамдах Турк Улсаас Монгол Улсад суугаа Элчин сайдын яамны ивээл дор Туркийн уран зураач Акын Экижигийн  “Амьдрал хэмээх аяллын түүхээс” үзэсгэлэнг зохион байгуулсан юм.

Бүгд найрамдах Турк Улс болон Монгол Улсын дипломат харилцааны жил бүрийг төлөөлүүлсэн нийт 50 уран зургаас бүрдэх тус үзэсгэлэн энэ сарын 11-ны өдрийг хүртэл Монголын Уран зургийн галерейд гарах юм.

Тэрбээр хуульч мэргэжилтэй бөгөөд өмгөөлөгчөөр ажилладаг ч зураач мэргэжлээ хэзээ ч орхилгүй уран бүтээлээ туурвисаар иржээ. Ингээд түүнтэй хэсэг хором ярилцсан юм.

-Хуульч мэргэжилтэй гэсэн. Тэгэхээр хэзээнээс уран зураг зурж эхэлсэн бэ?

-Ухаан орсон цагаасаа зурж эхэлсэн. Миний мэргэжил хуульч гэсэн зураг зурахаа орхиогүй. Магадгүй түр зуур орхисон тохиолдол бий. Одоогоос 10 жилийн өмнөөс уран бүтээлдээ цаг зав зарцуулах болсон. Миний хувьд Турк улсад нийт таван удаа бие даасан үзэсгэлэнгээ гаргаснаас гадна гадаадын 100 гаруй үзэсгэлэнд оролцож байснаас бус анх удаа хилийн чанадад Монгол Улсад бие даасан үзэсгэлэнгээ анх удаа гаргаж байгаадаа баяртай байна.

-Энэ “Мэргэ” хэмээх зургийн өгүүлэмжийн талаар манай уншигчдад тайлбарлаж болох уу?

Мэргэ зураг

 -Кофены шаараар мэргэлдэг шиг хүмүүс энэ зургийг хараад өөрийгөө мэргэлээсэй гэдэг утгаар зурсан. Энэ зургийг хараад хүн болгон өөр өөрийнхөө өнцгөөс харж мэдэрнэ. Энэ зургаас өнгөрсөн, ирээдүйн амьдралынхаа зөгнөлийг харах болно.

Уран бүтээлийг маань үзсэн хүмүүс өөрсдийнхөө өнцгөөс харж надтай хамт аялна гэдэгт итгэлтэй байна

-Таны уран бүтээлийг хараад байхаар дотроос нь нэг зүйл шинээр урган бий болж буй мэт дүрслэл, дүр зураг харагдсан?

-Та их сайн ажиглаж харсан байна. “Амьдрал хэмээх аяллын түүхээс” хэмээн нэрлэгдсэн нь таны түрүүний хэлсэн шиг өөрөөр тань төрөл бүрийн мэдрэмжийг өгөх зорилготой. Уг зорилгыг маань та анзаарч харсанд баяртай байна. Миний хувьд тухайн цаг үедээ аз жаргалтай байвал илүү тод өнгөөр уран бүтээлээ туурвидаг. Харин дотоод сэтгэл рүүгээ өнгийсөн үедээ хар бараан өнгөөр дүрсэлдэг ч сөрөг муу зүйлийг үзүүлэхийг зорьдоггүй. Уран бүтээлийг маань үзсэн хүмүүс өөрсдийнхөө өнцгөөс харж надтай хамт аялна гэдэгт итгэлтэй байна.

Монголын Уран зургийн галерейн захирал Б.Сарантуяа “Туркийн уран бүтээлчийн хувьд бусад уран бүтээлчдийн бүтээлээс нэлээн онцлогтой байгаа. Уран зургийн маш олон урсгал байдаг тэр болгоныг нэг зурганд хүртэл шингээж өгөн зурсан байна. Мэргэжлийн зураач биш ч гэсэн чадварлаг уран бүтээлчийн үзэсгэлэнг ирж сонирхоорой хэмээн хэлмээр байна” гэсэн юм.