LIVE: Ж.Ганболд: Дарханы хүүхдийн парк дээр казино барих гэж байна

Дархан хотын хүүхдийн паркийн газар дээр казино барих гэж буйг эсэргүүцэн тус аймгийн залуучуудын холбооноос өнөөдөр мэдээлэл хийлээ

Дархан-Уул аймгийн залуучуудын холбооны тэргүүн Ж.Ганболд

“Дархан хотын хүүхдийн парк бол 44.5 га газартай монголдоо томоохонд тооцогддог парк юм. Өнгөрсөн дөрөвдүгээр сарын 02-нд аймгийн ИТХ-аас паркийн эзэмшил газрын 8.4 га газрыг тусгай хэрэгцээнээс гаргасан. Үүнийхээ араас 15 га газарт нь казино байгуулах зураг төслийг БНСУ-ын компаниар хийлгэсэн байгааг бид олж мэдлээ. Тусгай хамгаалалтаас гаргасан 8.4 га газраа “Дархан Минж” гэдэг компанид эзэмшүүлсэн байсан.

Хүүхдийн паркийн 8.4 га газартай холбоотой асуудалд дарханчууд анхаарлаа хандуулж хэлэлцүүлэг, эсэргүүцэл өрнүүлээд эхэлтэл дахиад 15 га газарт дахин төлөвлөлтийг БНСУ-ын Сөүл хотын Казан дүүрэгт байрладаг Еэлдам гэдэг компаниар хийлгэсэн байгаа нь илэрсэн.

Жирийн хүн ийм өндөр үнэтэй компаниар энэ ажлыг хийлгэж чадахгүй. Ард нь маш том нөлөө бүхий хүн байна. Энэ ажлыг маш эртнээс төлөвлөж хийсэн болох нь тодорхой байна. Бид Дархан-Уул аймгийн удирдлагууд энэхүү хууль бус үйлдэлд холбоотой юу үгүй юу гэдгээ албан ёсоор мэдэгдэхийг шаардаж байна.

Улаанбаатарт газар зардаг асуудал одоо орон нутагт шилжжээ. Тэгэх тэгэхдээ бүр казино, зочид буудал, апартмент, театр, худалдааны төв зэргийг барьж байгуулахаар төлөвлөж, төсөв санхүүг нь хүртэл тооцчихсон байна. Дархан-Уул аймгийн Засаг дарга С.Насанбат, ИТХ-ын дарга Г.Эрдэнэбат нар энэ асуудалд холбоотой эсэх талаараа албан ёсоор мэдээлэл өгөх ёстой. Бид энэ асуудлыг шалгуулахаар өнөөдөр АТГ-т албан ёсоор хандана. Дархан-Уул аймгийг тэлж хөгжүүлэх ажлыг аймгийн удирдлагууд огт хийхгүй байгаа хэрнээ Дархан хотын төв зүрхэнд байгаа жижигхэн ногоон байгууламжийн газраас булаах дээрэмдэх ажлыг хийж байгаад гомдолтой байна” гэв.