Сан Франциско нүүр царайгаар таних технологийг хориглосон АНУ-ын анхны хот болов

АНУ-ын Сан Франциско хотын хууль тогтоох шатны эрх баригчид нүүр царайгаар таних технологийг хориглох эсэх талаар санал хураалт явуулжээ. Санал хураалтын дүнд хотын захиргааны байгууллагууд нүүр царайгаар таних технологийг ашиглахаас татгалзсан шийдвэр гаргалаа.

Уг технологийг ашиглахаас татгалзаж буй Америкийн анхны хот Сан Франциско болж байна. Тээвэр зуучлалын газар, хууль хяналтын байгууллага зэрэг хотын эрх мэдэлд байдаг газруудад царайгаар таних технологийг хэрэглэхгүй. Иймээс шинэ төрлийн хяналтын технологи нэвтрүүлэх шаардлагатай болж байгаа юм. Харин холбооны эрх баригчдын мэдэлд байдаг далайн боомт, нисэх буудлуудад хориглох боломжгүй.

Нүүр царайгаар таних технологийг эсэргүүцэгчид үүнийг иргэдийн аюулгүй байдлыг эрсдэлд оруулсан, гэмт хэрэгтэй тэмцэхэд саад учруулж байна гэж үзжээ. Иргэдийн хувийн мэдээлэл, эрх чөлөөнд халдсан ба орчин цагт тийм ч найдвартай технологи биш гэжээ. Эмэгтэйчүүд болон бараан өнгийн арьстай хүмүүсийн царайг буруу таньдаг гэж шүүмжлэгчид хэлсэн байна.

Умард Калифорниагийн Америк иргэдийн эрх чөлөөний холбооноос уг саналыг Сан Франциско хотын эрх баригчдад өргөн барьжээ. Тус холбооны төлөөлөгч Мэтт Кэгл хотын эрх баригчид саналыг нь хүлээж авч ардчилалд нийцээгүй хяналтын төхөөрөмжийг хориглосонд баяртай байна гэжээ.

Хотын зөвлөлийн гишүүдийн найм нь саналыг дэмжиж, нэг нь эсэргүүцэж, хоёр гишүүн оролцоогүй байна. Эрх баригчдийн олонх нь царайгаар таних технологи орчин үед ашиглахад тохиромжгүй гэдэгтэй санал нэгджээ.

Эх сурвалж: www.bbc.com