Ливийн босогчид Триполи хотыг эзлэх гэж оролдов
НҮБ-ын дэмжлэгтэй Ливийн Засгийн газрын мэдэгдсэнээр Триполи хотыг босогчид эзлэхийг завдаж, хотын ойролцоо болсон тулааны үеэр 21 хүн амиа алдаж 27 хүн гэмтэж шархадсан байна.
АНУ-ын Төрийн нарийн бичгийн дарга Майк Помпео зэвсэгт мөргөлдөөнийг нэн даруй намжааж энхийн замаар яриа хэлэлцээ хийхийг босогчдод уриалжээ. Генерал Халифа Хафтарын удирдсан босогчид Триполи хотыг эзлэх гэж дайрсан байна. Ерөнхий сайд Фаез аль Серраж босогчдыг эсэргүүцэж зэвсэгт хүчнийг дайчилжээ.
Өнгөрсөн амралтын өдрүүдэд болсон мөргөлдөөний үеэр амиа алдсан хүмүүсийн дунд Улаан загалмайн нийгэмлэгийн эмч, 14 босогч байгааг мэдэгдсэн байна. НҮБ-ын зүгээс тулааныг хоёр цагийн хугацаанд түр зогсоож гэмгүй иргэдийг нэн даруй нүүлгэн шилжүүлэхийг уриалсан боловч талууд зогсолгүй зэвсэгт мөргөлдөөнөө үргэлжлүүлжээ.
Триполи хотын аюулгүй байдлын асуудал хөндөгдөж эхэлсэн тул олон улсын байгууллагууд ажилтнуудаа нүүлгэн шилжүүлж эхэлсэн байна. Ливийн удирдагч Муаммар Каддафи 2011 онд алагдсанаас хойш улс төрийн тогтворгүй, эмх замбараагүй байдал газар авсаар байгаа юм.
Өнгөрсөн долоо хоногийн пүрэв гарагаас хойш генерал Хафтарын Ливийн Үндэсний арми хотын өмнөд болон баруун хэсэгт хэд хэдэн зэвсэгт халдлага дайралт хийгээд байна. Триполийн олон улсын нисэх буудлын орчимд тулалдаан үргэлжилсээр, босогчид хяналтаа тогтоосон гэж мэдэгджээ.
Түр гал зогсоох хэлэлцээрийг хүлээж авахгүй байгаа учраас НҮБ энгийн ард иргэдэд туслах боломж гарахгүй байгаа гэжээ. Түүнчлэн энэ сарын 14-16 өдрүүдэд Ливид бүх нийтийн сонгууль явуулахаар төлөвлөсөн ба санал хураалтын өмнө босогчидтой хэлэлцээр хийхээр НҮБ шургуу ажиллаж байна.
Эх сурвалж: www.bbc.com
Сэтгэгдэл (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.